Rumania, një anëtare e NATO-s, ka hapur një qendër ndërkombëtare trajnimi për pilotët nga vendet aleate për të operuar avionët luftarakë F-16 (EFTC), e cila do të jetë e hapur për të gjithë aleatët dhe partnerët, përfshirë Ukrainën gjatë luftës kundër Rusisë.
Rumania ndan një kufi 650 kilometra të gjatë me Ukrainën dhe konflikti atje u afrua pasi Moska sulmoi vazhdimisht portet ukrainase përtej Danubit, raporton Reuters.
Vitin e kaluar, Bukureshti vendosi të blejë 32 avionë luftarakë F-16 të përdorur nga Norvegjia, të prodhuar nga kompania amerikane Lockheed Martin, pasi bleu 17 modele nga Portugalia në vitin 2016.
Gjithashtu, Rumania synon të shpenzojë 6.5 miliardë dollarë për të blerë 32 avionë të rinj F-35 pas vitit 2030.
EFTC u hap në një bazë të forcave ajrore rumune pranë qytetit juglindor të Fetestit, duke përdorur avionë F-16 të ofruara nga Holanda, ndërsa mbështetja e trajnimit ofrohet nga Lockheed Martin dhe partnerët.
Qendra mund të fillojë trajnimin e pilotëve ukrainas që në fillim të vitit të ardhshëm, tha koloneli holandez Olivier Bok.
“Synimi është gjithashtu të trajnohen pilotët ukrainas”, tha ai, duke shtuar se zyrtarët rumunë nuk kanë vendosur ende një kornizë kohore, por trajnimi mund të fillojë “në fillim të vitit të ardhshëm”.
Në gusht, Shtetet e Bashkuara miratuan shitjen e avionëve danezë dhe holandez F-16 në Ukrainë për mbrojtje kundër sulmuesve rusë pasi të përfundojë trajnimi i pilotëve.
Ukraina po kërkon në mënyrë aktive F-16 për të kundërshtuar epërsinë ajrore ruse.
“Unë vërtet e shoh nevojën e tyre për të blerë aeroplanë F-16”, tha Bok.
Edhe pse disa pilotë ukrainas tashmë po i nënshtrohen trajnimit në Danimarkë dhe SHBA, Bok tha se Rumania është “më afër atdheut të tyre dhe (ka) pak a shumë të njëjtin mjedis”.
Ministrja holandeze e Mbrojtjes Kajsa Ollongren, e cila ishte e pranishme në hapjen e qendrës stërvitore, e pyetur nëse Holanda do të dërgojë avionë F-16 në Ukrainë, tha se kjo varet nga përgatitjet e palës ukrainase.
“Ata duhet të kenë pilotë të trajnuar, duhet të kenë personel mirëmbajtjeje, duhet të kenë infrastrukturë të gatshme dhe ne gjithashtu duhet të koordinohemi me partnerin tonë SHBA, sepse bëhet fjalë për pajisje amerikane”, tha ajo. /tesheshi.com/
