Dje Turqia ka kaluar një ditë të pazakontë, teksa në mëngjes, në orën 10:36, është ndërprerë energjia elektrike njëherësh në 45 qytete.
Kompania turke e transmetimit të energjisë, TEİAŞ, ia vë fajin një defekti në linjat e transmetimit, por ende nuk mund të thuhet me siguri se çfarë ndodhi.
Ndërprerja e energjisë vazhdoi për orë të tëra, dhe problemet më të mëdha pasdite me furnizimin i patën Ankaraja dhe Izmiri. I paprekur mbeti vetëm qyteti Van në Turqinë lindore, që e merr energjinë elektrike nga Irani.
Trena të ndalur, njerëz të mbetur në metro, në ashensore, semaforë jashtë pune, kaos në rrugë, avionë që bënë ulje të detyruar për shkak të daljes jashtë pune të radarëve – kjo ishte pamja që ofroi dje Turqia.
Incidente të tilla nuk janë të zakonshme në Turqi, dhe i fundit me përmasa të tilla ka ndodhur 16 vite të shkuara, në 1999-n, kur një sërë qytetesh në rajonin e Marmarasë mbetën pa energji pas një tërmeti rrënimtar.
Ministri i Energjisë dhe i Burimeve Natyrore, Taner Jëldëz (Taner Yıldız), u shpreh se shkaqet e ndërprerjes mund të ishin të ndryshme, e se ende po hetohej. Ai e përjashtoi spekulimin se shkak qe pamjaftueshmëria e rrjetit. Në shqyrtim është marrë dhe mundësia e një sulmi terrorist, apo e një sulmi kibernetik, ndërsa me gjithë ngritjen e një tryeze krize dhe orëve të gjata në kërkim të gjetjes së asaj çka ndodhi, nuk ka një përgjigje përfundimtare. /tesheshi.com/
