Fillimi i ndërtimit të 300 shtëpive për serbët në komunën e Zveçanit, projekt ky i financuar nga qeveria e Serbisë, ka bërë që njëzëri të reagojnë qeveria e Kosovës si dhe opozita kosovare.
Qeveria e Kosovës thotë se fillimi i ndërtimit të një lagje të tillë është e kundërligjshme, ndërsa opozita e quan rikthim klasik të Serbisë në Kosovë.
Kryeministri Isa Mustafa ka thënë se serbët e kthyer në Kosovë nuk kanë leje që të ndërtojnë lagjen “Lugina e Diellit” në veri të Kosovës. Këtë koment ai e ka bërë në Istog, ku u shoqërua nga shefi i Zyrës së Bashkimit Evropian në Kosovë, Samuel Zhbogar, ku inauguruan projektin “Mbështetja e agro-turizmit, bizneseve dhe zhvillimit ekonomik në Istog”.
“Ata (serbët) nuk kanë të drejtë për ndërtimin e lagjes ‘Lugina e Diellit’. Është e palejueshme dhe nuk ka asnjë vlerë përderisa institucionet nuk kanë dhënë leje”, ka thënë Mustafa.
MMPH “Luginën e Diellit” në Zveçan e konsideron të kundërligjshme
Ndaj projektit të paralajmëruar nga Beogradi për ndërtimin e shtëpive për serbët ka reaguar edhe Ministria e Mjedisit dhe Planifikimit Hapësinor, e cila thotë se nuk është informuar as konsultuar në asnjë moment për projektin e ndërtimit të lagjes për të kthyerit në Komunën e Zveçanit, përveç nga mediet.
MMPH edhe njëherë sqaron se fillimi i ndërtimit të kësaj lagjeje nuk mund të bëhet pa leje ndërtimore të lëshuara nga organet komunale në bazë të planit zhvillimor komunal dhe hartës zonale komunale.
“Komunat në veriun e Kosovës, nuk disponojnë këto dokumente të Planifikimit Hapësinor Komunal të përcaktuara me ligjin për planifikimin hapësinor NR 04/L-174. Mbështetur në këtë, çdo aktivitet ndërtimor i filluar në kundërshtim me dispozitat ligjore në fuqi nga ana e Komunës së Zveçanit, në këtë rast, do të konsiderohet i jashtëligjshëm. MMPH mbështet kthimin e qytetarëve të Republikës së Kosovës në vatrat e tyre, por është e vendosur që kjo të bëhet në bazë të legjislacionit në fuqi. Përkitazi me këtë rast, MMPH do të bashkëpunojë ngushtë edhe me Ministrinë e Administrimit të Pushtetit Lokal”, thuhet në kumtesën e kësaj ministrie.
AAK: Projekti në Zveçan, rikthim klasik i Serbisë në Kosovë
Ashpër ndaj projektit në fjalë ka reaguar edhe partia e dytë opozitare në vend, Aleanca për Ardhmërinë e Kosovës, e cila thotë se ajo çfarë po ndodh në Zveçan është rikthim klasik i Serbisë në Kosovë!
“Paralajmërimi se sot do të nisë ndërtimi i 300 shtëpive për serbët në Zveçan, projekt ky i financuar nga Qeveria e Serbisë, është përpjekje për kolonizimin e tretë të Kosovës, vlerëson Aleanca për Ardhmërinë e Kosovës”, thuhet në reagimin e kësaj partie.
Sipas AAK-së, Serbia nuk mund të realizojë asnjë projekt as madhor as të vogël në territorin e Kosovës.
“Qeveria e Kosovës e ka për obligim kushtetues ta mbrojë vendin nga ndërhyrjet e jashtme, siç është edhe ky i sotmi, ose nëse nuk ka fuqi ta bëjë një gjë të tillë, ajo duhet që urgjentisht të tërhiqet nga detyra, të cilën s’po mund ta realizojë.
Asnjë qeveri nuk mund ta shndërrojë Serbinë në hisedar të Kosovës, dhe mosreagimi i qeverisë dhe institucioneve të tjera të Republikës së Kosovës, është i barabartë me tradhti kombëtare. Aq më tepër vazhdimi i dialogut Prishtinë-Beograd, në një situatë të tillë, kur Serbia nuk e përfill as shtetin as Qeverinë e Prishtinës, s’ka më asnjë kuptim”, thekson AAK.
Partia e Haradinajt më tej shton se ndërtimi i 300 shtëpive për serbët nga qeveria e Serbisë dhe në territorin e Kosovës, nuk mund të konsiderohet ndryshe përpos si shkelje e sovranitetit dhe integritetit territorial të Kosovës.
“Edhe deputetët e kuvendit të Kosovës, është mirë ta rikthejnë edhe një herë betimin e dhënë dhe të mos mblidhen në seanca ku diskutohen çështje krejt ordinere, sikur Kosova është në normalitet. Kjo që po ndodh sot në Zveçan, është rikthim klasik i Serbisë në Kosovë!”, thuhet në reagimin e AAK-së. /tesheshi.com/
