Nga Donat Maloku
Familjet e të burgosurve në Maqedoni së bashku me familjet e të vrarëve të ‘Grupit Kumanova’, kanë mbajtur një takim më date 22 gusht ku kanë diskutuar rreth mundësisë së ngritjes së një padie penale ndaj shtetit të Maqedonisë për shkeljet e rënda që ka bërë në rastin ‘Kumanova’.
Familjarët e të arrestuarve në Grupin e Kumanovës besojnë se ka argumente të forta për padi, ndërsa kanë shfaqur shpresën se politika nuk do ta pengojë këtë padi.
Burime të portalit “Te Sheshi”, bëjnë të ditur se padia do të kërkohet të ngritet duke u bazuar në fakte të bazuara që posedojnë familjarët, që janë: torturimi dhe keqtrajtimi i të burgosurve pas arrestimit, mohimi i ndihmës mjekësore, dyshimi që disa persona mund të jenë vrarë pas dorëzimit, fshehja e të vërtetës së autopsies nga ana e Prokurorisë maqedonase por edhe asaj kosovare si dhe mohimi i vizitës nga familjarët edhe dhjetë ditë pas burgosjes.
Të gjitha këto shkelje, thonë familjet e të burgosurve dhe të vrarëve në Kumanovë, se janë të dënueshme sipas Konventës ndërkombëtare për të drejtat e të burgosurve ose robërve të luftës!
Familjarët thonë se të afërmit e tyre u tradhëtuan e u mashtruan edhe kur iu premtua që jashtë nuk ishin vetëm policia e ushtria maqedonase, por edhe OSBE-ja, por sipas familjarëve edhe kjo organizatë duhet të jap llogari para dikujt!
“Më 19 gusht 2015 Këshilli i familjeve ka paraqitur kërkesën për padi penale ndaj Maqedonisë në Këshillin për Mbrojtjen e të Drejtave dhe Lirive të Njeriut në Prishtinë. Zyrtarë ligjor të këtij Këshilli thanë që duhet filluar të mblidhen deklarata dhe prova nga familjaret dhe nga avokatët e të burgosurve, në bazë të cilave duhet të ndërtohet padia. Sipas tyre në fund duhet të rishikojmë edhe njëherë ligjet dhe të analizojmë se a kemi bazë juridike për ta bërë këtë padi! Deklaratat nga familjarët kanë filluar të mblidhen, aty përshkruhet gjendja shëndetësore, psiko-fizike e të burgosurve në ditët e para pas torturave dhe keqtrajmit katër ditor që u është bërë nëpër qelitë e stacionit policor në Shkup! Ne familjaret si dhe avokatët besojmë që kjo padi ka bazë të fortë për tu bërë ndaj këtij regjimi sllav. Ky shtet duhet të jap llogari dhe duhet të marr një goditje dënimi nga faktori ndërkombëtar jo vetëm për këtë rast, por edhe për shkeljet më elementare të të drejtave të njeriut, që ua bën të gjithë atyre që në atë vend quhen shqiptarë!”, ka thënë për portalin “Te Sheshi”, një prej familjarëve të personave të burgosur që ka qenë pjesë e takimit.
Burimi i portalit tonë ka thënë se padia mund të dështojë vetëm nëse deklaratat e tyre dhe raportet mjekësore nuk i sigurojnë nga familjarët, avokatët dhe Kryqi I Kuq ndërkombëtarë. “Mund të dështojë edhe nëse politika i fut hundët në Këshillin për Mbrojtjen e të Drejtave dhe Lirive të Njeriut (KMLDNJ). Ne familjarët po punojmë të ngritim këtë padi sepse e dimë që kemi bazë për t’i paditur”, ka thënë burimi ynë.
Këtë padi familjaret thonë se do ta dërgojnë në Organizatën për Siguri dhe Bashkëpunim në Evropë (OSBE), në organizatën Amnesty International dhe në Gjykatën europiane kundër torturës në Strasburg.
Portali “Te Sheshi”, meson se temë tjetër në takimin e familjarëve ishte ideja e një proteste para Qeverisë në muajin shtator. Në këtë protestë do kërkohet publikimi i rezultateve të autopsisë së shqiptarëve të vrarë në Kumanovë si dhe monitorimi ose angazhimi faktorit ndërkombëtar në procesin e gjykimit i cili pritet të fillojë së shpejti, në mënyrë që e vërteta të mos kamuflohet, por të bëhet një gjykim i drejtë i rastit të Kumanovës. Protesta do të mbahet në Prishtinë.
Familjari i një prej personave të burgosur ka treguar për portalin tonë se para dhjetë ditësh kanë vizituar familjarët e tyre, gjendja fizike e të cilëve është e mire por që psikologjikisht janë në gjendje të rëndë sepse kanë kaluar trauma të mëdha.
Burimi ynë ka thënë se avokatët kanë kërkuar një ekspert mjeko-ligjor ndërkombëtar për të konstatuar gjendjen e të burgosurve nëse janë të gatshëm për gjykim. Kjo kërkesë ende nuk është aprovuar tregon familjari dhe nuk dihet nëse do të pranohet apo jo nga prokuroria.
/tesheshi.com/
