Nga Mensur Krasniqi
Nën organizimin e Kongresit Botëror Maqedonas, qindra protestues në mesin e të cilëve edhe disa funksionarë të komunave nga radhët e VMRO-DPMNE-së, kanë protestuar përpara Ministrisë së Punëve të Brendshme. Ata kërkojnë dorëheqjen e ministrit të MPB-së, Oliver Spasovski meqë ai si ministër nuk ka marrë asnjë masë për të parandaluar shkatërrimin e themeleve të kryqit në komunën e Butelit nga ana e përfaqësuesve dhe simpatizantëve të BDI-së.
Kryetari i Kongresit Botëror Maqedonas, njëherit edhe iniciatori për vendosjen e kryqit në lartësi prej 55 metrave në komunën Butel të Shkupit, ku pjesa dërmuese i takon komunitetit shqiptar dhe mysliman, para protestuesve maqedonas ka deklaruar që ata e dënojnë vandalizmin dhe demolimin e themeleve të kryqit në Butel, ndërsa kërkojnë të hiqet shqiponja në Çair.
“Kjo që u bë më 3 mars është parë nga ISIS në Irak dhe Siri. KBM vërteton se në Maqedoni nuk do të përsëritet skenari i Ukrainës dhe Sirisë. Në Maqedoni nuk do të lejojmë luftë në bazë fetare dhe etnike me qëllim formimin e qeverisë për ndryshimin e emrit të shtetit Maqedoni dhe identitetin e maqedonasve”, ka thënë Todorov.
Ata gjithashtu kërkuan që MPB të sigurojë kushte për ndërtimin e kryqit në Butel, ta kthejë lokacionin dhe të ndërmerr masa për personat që e kanë dëmtuar parcelën e në të cilën është paraparë të ndërtohet kryqi. /tesheshi.com/
