Nëse kërkon të gjesh një të veçantë në ndeshjet e javës së tretë të Ligës së Europës, ajo është pa dyshim mungesa e një rezultati të bardhë, pa gola. Edhe pse nuk mungojnë fitoret minimale, madje janë gjashtë të tilla, në 24 takime nuk has një të tillë ku të mos jetë shënuar.
Fitoren më të thellë në mbrëmjen e së enjtes e arriti Shakhtari i Donjeckut, që mposhti 5-0 belgët e Gentit.
Dy janë takimet që pasojnë për nga rezultati i thellë: Mançester Junajtedi fitoi 4-1 ndaj Fenerbahçes, e me të njëjtat shifra Olimpiakosi doli fitues ndaj Astanasë.
Barazimi me më shumë gola u regjistrua në kryeqytetin italian, ku Roma lëshoi çuditshëm terren ndaj Austrisë së Vjenës në minutat e fundit, e nga 3-1 për vendasit, në fund u shkua në 3-3.
Mançester Junajtedi u ngushellua me një fitore ndaj turqve të Fenerbahçes për të lënë pas atë paraqitje të shëmtuar të hënën ndaj Liverpulit në “Anfield”, ku “parkoi avionin”, e jo “autobusin”, para portës. Në fitoren 4-1 ndihmuan dy 11-metërsha të kthyer në gol; për t’u shënuar rikthimi i buzëqeshjes te Pogba, që shënoi dy herë.
Interi fitoi 1-0 ndaj Sauthemptonit, në një moment kritik pas rezultateve të njëpasnjëshme negative. Goli i Candreva-s në minutën e 67-të u dha zemër interistëve të shohin përpara.
Selta Vigo – Ajaks, Standard i Liezhit – Panathinaikos dhe Osmanllëspor – Vilareal patën të gjitha të njëjtin përfundim: 2-2.
Në barazim 1-1 u mbyllën takimet Steaua e Bukureshtit – Zyrih, Konjaspor – Sporting Braga, Rapid i Vjenës – Sasuolo, Mainz – Anderleht.
Fitoret 1-0 u regjistruan në ndeshjet Fejënord – Zorja dhe Sent-Etjen – Kabala. Me të njëjtat shifra, por në transfertë, u mbyllën sfidat Hapoel Bir Sheva – Sparta e Pragës, Krasnodar – Shalke dhe Salcburg – Nisë.
Karabaku, me të cilin aktivizohet Ansi Agolli, e që ishte në fushë mbrëmë, doli fitues ndaj PAOK-ut, duke i shënuar gy gola e duke mos pësuar asnjë. Po 2-0 fitoi dhe Genku ndaj Atletik Bilbaos.
Në tre sfida të tjera, Viktoria Plzen u mund 1-2 nga Astra; Dundalk – Zenit dhe Az Alkmar – Makabi i Tel-Avivit gjithashtu u mbyllën me fitoret 1-2 të skuadrave udhëtuese.
Fiorentina mori tre pikë në transfertën ndaj Sllovan Liberecit, duke e mposhtur atë 1-3, e po 3-1 fitoi Jang Bojsi ndaj APOEL-it. /tesheshi.com/
