Kryeministri malajzian Mahathir Mohamad shprehu mbështetje për gjigantin teknologjik kinez Huawei, edhe përkundër luftës që SHBA i ka shpallur kompanisë në fjalë.
“Malajzia do të vazhdojë të përdorë sa më shumë teknologjinë e tyre,” tha Mahathir në një konferencë në Tokio.
Presidenti i SHBA-ve, Donald Trump në fillim të muajit nënshkroi një urdhër ekzekutiv që ndalonte kompanitë amerikane që të punonin me Huawei. Huawei ka paraqitur mocione kundër ligjit, duke argumentuar se një ndalim i tillë do të dëmtonte edhe interesat amerikane.
Mahathir tha se SHBA dhe Perëndimi duhet të pranojnë faktin që kombet aziatike tani prodhojnë mallra konkurruese dhe nuk duhet të ndjehen të “kërcënuar” nga rivalët e biznesit.
Mahathir argumentoi se Malajzia ishte “shumë e vogël për të pasur ndikim në kompaninë Huawei”, duke shtuar se kompania kishte qasje në kërkime “shumë më të mëdha se gjithë ekuivalenti i kërkimit të Malajzisë”.
Komentet e tij vijnë pas një valë polemikash mbi firmën kineze të telekomunikimeve, e cila është goditur nga akuzat për spiunazh.
Një numër vendesh në mbarë botën kanë bllokuar Huawei nga puna në rrjetet e tyre mobile dhe kompanitë kanë hequr dorë nga firma pas ndalesës amerikane. /tesheshi.com/
