LSI ka reaguar sërisht me kreun e grupit të saj parlamentar, Petrit Vasili, në lidhje me institucionet e vetingut.
Sipas tij, shkurtimi me 70 persona i strukturës së propozuar nga 3 institucionet e vetingut është i qëllimshëm, ndërsa akuzoi qeverinë se po fsheh qëllime të errëta.
Vasili tha se numri i propozuar me 184 persona nga institucionet e vetingut është disa herë më i vogël se ai që ka sot ILDKPI.
“Në aktin normativ të qeverisë që do të kalojë nesër, është parashikuar që fondi rezervë që vihet në dispozicion janë 203 punonjës. Kemi të bëjmë me një mazhorancë që edhe do ta kapë vetingun dhe së dyti, edhe qesharake në mënyrën se si sillet brenda vetes. Në fillim do të miratojë 203 punonjës dhe më pas do ta shkurtojë në 110 punonjës. Pra qeveria ka vendosur më shumë se çka kërkuar organi i vetingut dhe më pas mazhoranca i shkurton që t’ia shtojë skuadrës së kryeministrit.
Besoj që kjo është shqetësim madhor për opinionin publik dhe ka të bëjë me qëllime të errëta. Edhe Kuvendi i Shqipërisë vendoset në një situatë të paprecedentë në historinë e tij. Kemi një raport midis mazhorancës dhe mazhorancës që lidhet edhe me qëllime të errëta, por edhe me paaftësi”, tha Vasili. /tesheshi.com/
