Mohamed Salah është surpriza e sezonit për sytë e të gjithëve. Egjiptiani i Liverpool, me trajnerin Jurgen Klopp, është shndërruar nga lojtar i mirë, në një superstar. E normalisht që ka hyrë në listat e dëshirave të klubeve më prestigjoze.
Por tek Liverpool, i cili është vlerësuar për lojën sulmuese dhe argëtuese, ka edhe një tjetër problem, në kuptimin pozitiv të fjalës. Ka rifituar besim dhe formë të shkëlqyer, edhe ylli tjetër i skuadrës, braziliani Coutinho. Ky është edhe “halli” më i madh i skuadrës britanike.
Që do të mbushë arkën, ndoshta që në janar, kjo dihet, por a do të mjaftohet me aq, apo do të dojë, ta mbushë derisa ta “derdhë” arkën nga milionat, kjo është për t’u parë. Sepse për Salah, Reali i Madridit mund të shkojë deri në 100 milion euro.
Shifra fillimisht u duk e egzagjeruar kur u hodh në treg nga klubi i Liverpool, por gradualisht ka filluar të duket normale, pasi rradha e klubeve që e duan mëngjarashin e sulmit, sa vjen e rritet.
Nga ana tjetër, Barcelona nuk e ka problem një tjetër qindshe milionësh, për të marrë një dëshirë “që po i plas shpirtin”, siç është Coutinho.
Të ndodhur në këtë situatë, drejtuesit e “Të kuqve” kanë marrë një vendim: cila marrëveshje të nënshkruhet më parë, sipas kushteve të ofruara nga britanikët, do të “bllokojë” marrëveshjen tjetër. Kjo do të thotë që nëse shitet më parë Salah tek Reali, Coutinho do të qëndrojë edhe një sezon…dhe anasjelltas. Pa folur pastaj për Sadio Mane, për të cilin janë paraqitur “vetëm” 3 oferta nga klube të mëdha.
Nuk thonë kotë: hall të kesh disa lojtarë të mirë në skuadër, e hall të mos i kesh. Në këtë mes, vetëm trajneri Klopp nuk prish qejf. Ai thotë se do të vijojë të drejtojë lojtarët e Liverpoolit, pavarësisht se cilët ikin e cilët vijnë. Megjithëse edhe atij shpirti ia di si i thotë ato fjalë.../tesheshi.com/
