Burime nga LDK bëjnë të ditur për “tesheshi.com” se qeveria serbe i ka bërë të ditur Kryeministrit të Kosovës Isa Mustafa, se Lista Serbska e Aleksandar Jabllanoviç do të kthehet në Kuvendin dhe qeverinë e Kosovës menjëherë pas miratimit të Gjykatës Speciale. Ky organ do të jetë një institucion ekstrta kushtetues dhe ekstra republikan që do të tentojë të bëjë atë që nuk e kanë bërë gjykata më të mëdha ndërkombëtare, presionin ndaj lavdisë historike dhe politike të Ushtrisë Çlirimtare të Kosovës.
Kjo Gjykatë speciale do të vendosë shumë “kripë mbi plagë” dhe vetë Hashim Thaçi e ka cilësuar këtë si një “veprim jo të drejtë të ndërkombëtarëve por Kosova ka për detyrë të bëjë atë që thonë partnerët”/ Nga ana tjetër brenda vetë mazhoprancës, pra PDK pritet një votim kundër krimi i Gjykatës ndaj kërkohen numrat e Listës Serbska. Por nëse votat e Jabllanoviçit bëhen të domosdoshme atëherë cili është pazari që Mustafa e Thaçi kanë bërë si “peshqesh” ndaj Jabllanoviçit?!
Përfaqësuesit e Listës Serbe në Kuvend dhe në Qeverinë e Kosovës vazhdojnë bojkotin, tashmë në muajin e dytë, prej 3 shkurtit, kur kryeministri kosovar Isa Mustafa shkarkoi ministrin serb Aleksandar Jablanoviç, pasi deklarata e tij ku protestueset në Gjakovë i kishte quajtur “egërsira” shkaktoi shumë reagime dhe protesta, made edhe të dhunëshme.
Për këtë javë, drejtori i zyrës për Kosovën në qeverinë e Serbisë ka paralajmëruar një “takim emergjent me të gjithë përfaqësuesit e të gjitha komunave të banuara me serbë”, në të cilin do të shqyrtohen hapat e mëtejmë pas përjashtimit të ministrit.
Krijimi i Gjykatës Speciale për krimet e supozuara të UÇK-së pritet ta rikthejë Listën Serbe në Kuvendin e Kosovës, pas bojkotit gati dymujor. Por, ky vullnet i serbëve nuk ekziston edhe për krijimin e Forcave të Armatosura të Kosovës, për çka Qeveria pati paralajmëruar se do ta ndryshojë Kushtetutën. Krijimi i Gjykatës Speciale nuk do të rrezikohet nga Lista Serbe, pa votat e së cilës nuk mund të bëhen ndryshimet e nevojshme kushtetuese. Zyrtarë të Listës Serbe nuk kanë pohuar as mohuar kur janë pyetur nëse Gjykata Speciale do të jetë shkas për rikthimin e tyre në institucionet e Kosovës.
Marrëveshja për bashkëqeverisje, e arritur në mes partnerëve të koalicionit PDK-LDK me Listën Serbe, ku parashihet që brenda 3-5 muaj të krijohet Asociacioni i Komunave Serbe nuk mund të zbatohet derisa pala serbe nuk implementon marrëveshjet e arritura në Bruksel.
Pavarësisht faktit se kanë kaluar më shumë se tre muaj prejse është themeluar Qeveria e re, zyrtarë të ekzekutivit ia kanë bërë të qartë përfaqësuesve të Listës Serbe se Asociacioni i Komunave me shumicë serbe do të krijohet vetëm atëherë kur do të ndodhë zbatimi i marrëveshjeve të arritura në Bruksel, sikurse për çështjen e drejtësisë, shuarjen e strukturave paralele serbe, të cilat veprojnë në pjesën veriore të Kosovës dhe shumë marrëveshja tjera të arritura. “Çështja e Asociacionit të Komunave Serbe duhet të presë derisa të nisë implementimi i Marrëveshjes së 19 prillit, që është arritur në Bruksel në vitin 2013”, ka thënë ministrja pa portofol, Edita Tahiri, e cila udhëheq dialogun teknik me Serbinë.
Megjithatë, mediet serbe raportojnë se njëra prej kërkesave të Listës Serbe për t’u rikthyer në institucionet e Kosovës është formimi i Asociacionit të Komunave Serbe. Deputeti i LDK-së, Sadri Ferati, ka vlerësuar se tash për tash Lista Serbe nuk është duke lënë ndonjë pasojë me mospjesëmarrjen e saj në Kuvend dhe Qeveri.
Ferati ka theksuar për gazeten Epoka e Re se veprimet e kësaj liste nuk janë përcaktuese për funksionimin e koalicionit qeverisës. Por, sipas tij, nëse do të vazhdohet me këtë qasje, atëherë do të ketë pasoja, eventualisht kur Kuvendit do t’i vijnë disa ligje të cilat kërkojnë pjesëmarrjen dhe votën e serbëve. Ferati ka thënë se nuk është e pëlqyeshme dhe serioze që për çdo temë Lista Serbe të veprojë kësisoj.
(tesheshi.com)
