Kushtet që ofron Shqipëria janë të përshtatshme, për zbatimin e ligjit e importit të mbetjeve. Kjo ka qenë përgjigja e Bashkimit Evropian përmes një letre, që u përcoll përmes Eduart Shalsit, kreu i komisionit të Veprimtarisë Prodhuese.
Pas shumë debatesh dhe kundërshtimesh, ky ligj u votua në parlament, por u dërgua për rishqyrtim nga presidenti, Bujar Nishani. Nga ana tjetër, qeveria ia dërgoi atë për verifikim Bashkimit Evropian, përgjigjia e së cilës mbërriti sot (e hënë).
“Duke vlerësuar siuatën specifike të Shqipërisë në fushën e menaxhimit të mbetjeve dhe mungesës së infrastrukturës së përshtatshme për menaxhimin e mbetjeve në vend, ne besojmë se amendimet në ligj, për menaxhimin e integruar të mbetjeve janë të mirëadoptuara dhe të përshtatshme për Shqipërinë, në këtë moment”, shkruan delegacioni evropian, në letrën e dërguar.
Për të kundërshtuar këtë ligj, janë organizuar protesta të shumta nga banorët, të mbështetur edhe nga shoqëria civile. Këtë qëndrim ka mbajtur edhe opozita./tesheshi.com
