Deputeti demokrat Myslim Murrizi ka publikuar në rrjetin social përgjigjen nga Autoriteti i Dosjeve të Ish-Sigurimit të Shtetit, nëse ai ka patur lidhje apo jo me Sigurimin e Shtetit.
Përgjigjia nga institucioni i ri, që drejtohet nga Gentjana Sula ka qenë negative. Në këtë përgjigje, rezulton se për Murrizin nuk ka asnjë dosje, qoftë survejimi apo bashkëpunimi.
Veprimi i Murrizit bëhet në një kohë kur debati për komunizmin po nxehet, veçanërisht pas zgjedhjes së Gramoz Ruçit në postin e kryetarit të Kuvendit dhe portreteve të diktatorit Enver Hoxha në festën e Pezës.
“Kjo është përgjigjia zyrtare e ardhur nga komisioni i verifikimit të figurave, për lidhjet me sigurimin e shtetit.
E kemi detyrim moral dhe ligjor që të 140 deputetët, nga kryetari Ruçi deri te i fundit ti drejtohemi këtij komisioni për të qartësuar qytetarët në lidhje me të kaluarën tonë.
Deputetët e PD, më shumë se çdo ligjvënës tjetër i Kuvendit. Mirë do ishte edhe të gjithe ish-deputetët, që bëjnë faktorin nëpër ekrane( nëse nuk kanë frikë)”, shkruan Myslim Murrizi në rrjetet sociale. /tesheshi.com/
