Ndryshe nga sa po vepron partia e tij, LSI, e cila është angazhuar fuqishëm në denoncimin e qeverisjes, ish-aleate deri paradisa muajsh, Lefter Koka, ish-ministër Mjedisi në “Rama 1”, i ka dalë krah ish-shefit në ekzekutiv, për të mbrojtur dhe punën e tij të djeshme. Shkak janë bërë akuzat e opozitës lidhur me impiantet e mbetjeve, ku dhe aty sheh aferë korruptive. Por Koka, autor i tyre, nuk pajtohet me opozitën, edhe pse është në opozitë.
Ja shpjegimi i tij, me shumë teknik sesa politik:
Rasti i qytetit të Elbasanit ku është ndërtuar një impiant për pëpunimin dhe asgjesimin e mbetjeve, përmes asgjesimit përftimin e energjisë. Ka një vlerë totale përreth 20 mln euro, paguhet nga buxheti i shtetit për 7 vjet dhe pas 7 vitesh bëhet pronë e bashkisë apo qeverisë qëndrore. Pas 7 vitesh bashkia e Elbasanit nuk paguan asnjë taksë për depozitimin e mbetjeve në këtë impiant. Përftimi i 2.8 megavat energji besoj se është një e ardhur e cila në vitet në vijim do t’i shërbejë qytetit të Elbasanit. Më shumë se 1.5 milion euro do të jenë të bollshme për të bërë ndoshta dhe pastrimin e qytetit apo investuar.
Të dëgjosh pastaj shifra, unë besoj se janë keqinformime. Këto janë kontrata të depozituara dhe çdonjëri nga ju mund t’i shohë.Gjatë viteve si ministër Mjedisi kuptoj që fjala ‘mbetje’ apo shpesh herë dhe ‘plehra’ irriton çdo qytetar, qoftë edhe politikanë. Por nëse ne nuk mundemi dot të dëgjojmë njëri-tjetrin nuk mundemi as të menaxhojmë mbetjet. Mendoj se kemi bërë zgjedhjen më të duhur.
Si paralelizëm ju sjell një tjetër investim të nisur që në kohën kur PD ishte në pushtet. Është në vijim dhe është mirë që të bëhet. Investohet në Vlorë një landfill dhe ka një kosto depozitimi 25 euro për ton. Investimi është rreth 20 milion euro, duke i falur taksat është 24 milion euro dhe Bashkia e Vlorës duhet të paguajë 24 euro për ton. Do paguajë çdo vit rreth 2 milion euro.
Bashkia e Vlorës pas 20 vitesh do të ketë një tokë prej 20 hektarësh me 15 metra lartësi mbetje dhe një shpenzim të bërë 60 milion euro, kosto ndërtimi dhe pagesë depozitimi.
Ndërsa rasti i Elbasanit, jetëgjatësia është mbi 50 vjet dhe pas 20 viteve ky investim është vetëpaguar dhe ka filluar të fitojë 1.8 milion euro në vit.
Kemi qenë aleatë me PD, me PS, ka qenë aleatë PD me PS dhe bashkëqeverisëm. Nuk duhet kurrësesi të pushojmë në pranverë dhe të çelim në vjeshtë për interesa bashkëqeverisje apo politike.
Mbetjet janë problem kombëtar. Kemi 380 vend depozitimesh. Nëse duam ta mbushim Shqipërinë me varreza dhe landfille, vazhdojmë në këtë mënyrë dhe i kemi një dhuratë shumë të shëmtuar dhe vdekjeprurëse qytetarëve shqiptarë. Nëse vazhdojmë në këtë rrugë u bëjmë shërbimin më të keq qytetarëve duke i dezinformuar. /tesheshi.com/
