Ende pa bërë dy javë nga formimi, qeveria “Haradinaj” vazhdon të marrë “kërcënime” nga opozita se do rrëzohet së shpejti.
Është shefi i grupit parlamentar të LDK-së, Avdullah Hoti, i cili së fundmi ka thënë se do t’i përdorin të gjitha mjetet demokratike për të mos lejuar që vendi të qeveriset nga koalicioni aktual.
I pyetur se a do të përdorin votën e deputetit Zafir Berisha, për të rrëzuar qeverinë ai ka thënë se koalicioni duhet të tërhiqet vetë.
“Është në interes të vendit që sa më parë vet publikisht koalicioni dhe vet kryeministri të japin dorëheqje, mos të presin rrëzimin e qeverisë, sepse sot nuk i kanë 61 vota në Kuvend të Kosovës, kështu nuk funksionon Kuvendi. Do t’i përdorim të gjitha veprimet demokratike për të mos lejuar që vendi të qeveriset kështu si ka filluar duke u shkelur rregullorja, duke u shkelur Kushtetuta pa asnjë program të qartë. Kemi me siguruar rrugën pro evropiane që ne e kemi nisur me qeverinë e kaluar bashkë me partnerët tanë”, u shpreh Hoti. /tesheshi.com/
