Nga Blendi Gashi
Se drejtësia kosovare është e kapur nga politika dhe hedh vallen si të dojë kjo nuk ka fije dyshimi. Për të vërtetuar këtë janë përkujdesur së fundmi edhe prokurorë të caktuar, të cilët kanë publikuar një foto ku shihen duke drekuar në Bogë të Rugovës me një nga zyrtarët e lartë të PDK-së, konkretisht nënkryetarin e kësaj partie Hajredin Kuçi, i cili për vite me radhë drejtoi Ministrinë e Drejtësisë dhe ishte “krahu i djathtë” i Thaçit.
Së bashku me Kuçin kanë drekuar ata që bëjnë drejtësinë në vend, prokurorë e gjykatës, duke filluar nga kryeprokurori i Shtetit, Aleksandër Lumezi, kryetari i Këshillit Prokurorial të Kosovës, Blerim Isufaj, së bashku me Kryeprokurorin e Prokurorisë së Apelit në Prishtinë, Haxhi Dërguti, i njohur si personazh përmes aferës “Pronto”, pastaj kryeprokurori i Prokurorisë Themelore të Gjilanit, Jetish Maloku, prokurori Haxhi Sinani, njëherësh anëtar i Këshillit Prokurorial të Kosovës, drejtori i Sekretariatit të Këshillit Prokurorial, Lavdim Krasniqi, kryetari i Gjykatës Themelore në Prizren, Ymer Hoxha, kryetari i Gjykatës Themelore në Gjakovë, Vaton Dërguti, dhe kryeprokurori i Prokurorisë Themelore të Pejës, Agim Kurmehaj.
Ky i fundit, është ai që ka zbuluar drekën përmes një foto të publikuar në profilin e tij në Facebook, të dielën në orët e pasdites, me mbishkrimin “me parinë e prokurorisë në Bogë”.
Dreka e kësaj parie të dielën, sipas kryeprokurorit të Pejës, Kurmehaj, ka qenë personale, e organizuar prej tij.
“Unë me Hajredinin njihem që sa vite, edhe me të tjerët. Unë i kam mbledhur të gjithë, pasi disa prej tyre nuk kanë qenë asnjëherë në Rugovë. Ka qenë thjesht një ndejë personale, asgjë më shumë”, ka deklaruar Kurmehaj për “Betimi në Drejtësi”.
Sipas kryeprokurorit Kurmehaj, fakti që aty ka qenë prezent edhe nënkryetari aktual i PDK-së, Hajredin Kuçi, nuk paraqet ndonjë konflikt interesi, pasi, siç tha ai, aty nuk kanë biseduar asgjë lidhur me çështje të punës.
“Fotografia dëshmon se drejtësia është e kapur nga ‘Pronto’”
Ndaj drekës private mes Kuçit dhe krerëve të drejtësisë ka reaguar edhe opozita duke thënë se fotografia e publikuar nga kryeprokurori i Pejës tregon se si PDK ka kapur drejtësinë.
Ish-kryetarja e Komisionit për Legjilascion, tani deputete e Vetëvendosje-s Albulena Haxhiu thotë se fotografia në fjalë tregon qartë pse sistemi i drejtësisë ka toleruar korrupsionin dhe nuk ka prekur “jakat e bardha” dhe pse i njëjti, sipas saj, është vënë në shërbim të plotë të klanit ‘Pronto’ duke arrestuar aktivistë politikë dhe duke akuzuar kështu për një vepër ndër më të rëndat që njeh legjislacioni penal!
“Praninë e Hajredin Kuçit aty, Kryeprokurori i Pejës e arsyeton me faktin se e kanë mik. Po kuptohet se përndryshe nuk do të mund të ishin pjesë e sistemit të drejtësisë. Ai po ashtu qenka arsyetuar po citoj ‘nuk kemi biseduar asgjë për çështjet e punës’…
Sistemi i drejtësisë është edhe më keq sesa që ne mendojmë. Ai duhet të çlirohet nga klani ‘Pronto’ dhe nga prokurorë e gjyqtarë që i kanë shërbyer këtij klani për vite me radhë!
Besoj Alekdandër Lumezi duhet ta sqaroj këtë!”, thotë deputetja Haxhiu.
Dreka private me Kuçin i bën kryeprokurorët e gjykatësit të “kapur”
Pavarësisht se kryeprokurori Kurmehaj mundohet ta cilësojë si drekë personale, prania e Kuçit që vazhdon të mbetet njeri i fuqishëm në PDK dhe e kaluara e tij si udhëheqës i drejtësisë pashmangshëm shton dyshimet raste të ndryshme korruptive të politikanëve të lart mund të mbyllen, gjithë duke aluduar në miqësinë mes tyre, por duke mos harruar edhe aferën “Pronto” ku bashkëpartiaku i Kuçit, ish-kreu i grupit parlamentar të PDK-së Adem Grabovci vendos për punësime brenda sistemit të drejtësisë.
Janë disa raste në aferën e përgjimeve “Pronto” që tregojë se si Grabovci ka qenë i përfshirë në emërim të prokurorëve e gjykatësve.
Ai në përgjimet e publikuara dëgjohet se si kërkon nga një person që të sigurohet nëse Salih Mekaj është njeriu i duhur për të drejtuar Gjykatën e Apelit, i cili më pas zgjidhet në këtë post.
Po ashtu nuk duhet harruar edhe emërimin e ish-zyrtarit të PDK-së Bahri Hyseni si kryeprokuror edhe pse paraprakisht Grabovci e kishte përzgjedhur për anëtar të Bordit të Transmisionit dhe Tregut, por që nuk u emërua në këtë post pasi Hyseni nuk kishte konkurruar fare dhe nuk e dinte se çfarë do të thotë KOSTT.
Një rast tjetër poashtu pjesë “Pronto”-s është se si një person i rekomandon Grabovcit që të ndikojë në emërimin e Hasan Sadikut, anëtar në Këshillin Gjyqësor të Kosovës.
Ndaj mbetet të shihet në ditët në vazhdim nëse do ketë një reagim për “Drekën e Bogës” nga vet Kuçi dhe kryeprokurori Lumezi, apo edhe ata si kryeprokurori Kurmehaj do e cilësojnë një ndejë private që nuk është diksutuar për punë duke mohuar kapjen e drejtëisë nga politika./tesheshi.com/
