Kur’ani: si u përgjigjet Suedia muslimanëve të indinjuar shqiptarë

Shteti suedez nuk pajtohet me aktin e djegies së Kur’anit, edhe pse ai ndodhi së fundi në Suedi, në kryeqytetin Stokholm, pikërisht në ditën e Kurban Bajramit.

Është ambasada suedeze në Tiranë ajo që i është përgjigjur Forumit Musliman Shqiptar, ku vetë ambasadorja Elsa Håstad shkruan:

“Ne i refuzojmë me forcë këto akte të cilat në asnjë mënyrë nuk pasqyrojnë opinionet e Qeverisë Suedeze.

Djegia e Kur’anit ose e ndonjë libri tjetër të shenjtë është fyese, mungesë respekti dhe një akt i qartë provokimi.

Ne do të përcjellim letrën tuaj në Suedi siç kërkohet nga ana juaj.”

Ky reagim vjen nga një leytër proteste drejtuar përfaqësisë diplomatike suedeze në Tiranë, ku ndër të tjera thuhet:

“Ajo që prek dhe lëndon më tej ndjenjat tona është se këtij individi ju dha mbrojtje nga organet policore suedeze në këtë shfaqje të turpshme, e cila mund të konsiderohet gjithçka, por jo demokratike.

Liria e mendimit ndaj Kuranit nuk shprehet duke e shkelmuar dhe djegur atë. Ndërkohë historia ka treguar, se ata që djegin dhe shkelmojnë libra janë të gatshëm të djegin dhe shkelmojnë edhe njerëz. Liria e mendimit shprehet përmes fjalës së argumentuar dhe jo duke fyer dhe përdhosur shenjtëritë e të tjerëve. Një akt i tillë për muslimanët është shumë më tepër sesa vrasje dhe cenimi fizik i tyre, që padiskutim dënohet me ligj edhe në shtetin tuaj”.

Kështu, duke vlerësuar reagimin suedez, përcjellë nga qëndrimi i ambasadores, del në pah paradoksi në këtë shtet nordik, ku shteti lejon akte me të cilat nuk është dakort…në emër të lirisë së shprehjes(!!!). /tesheshi.com/