Nga Bashkim Kastrati
Paralajmërimi i kryeministrit shqiptar Edi Rama se do të ketë për modernizmin kufitar mes Shqipërisë dhe Kosovës, dhe bashkëpunim ekonomik është i mirëseardhur.
Rama u ka thënë medieve në Shqipëri se në vitin 2018 do të fillojë modernizimi kufitar Shqipëri Kosovë. Ai e ka quajtur të papranueshme situatën në kufirin midis dy shteteve, Shqipërisë dhe Kosovës.
“Ne duam që më 1 janar, kufiri i Shqipërisë me Kosovën, të mos jetë më një torturë për bashkë-atdhetarët tanë nga ana tjetër e kufirit, sidomos në periudhën e pikut, por të jetë një kufi që të kalohet siç kalohet normalisht mes Gjermanisë dhe Francës. Besoj që mund ta bëjmë këtë gjë, që t’i çlirojmë më në fund njerëzit”, ka deklaruar Rama.
Ndërtimi i një pike të përbashkët kufitare dhe heqja e doganave gjithsesi do të nxiste zhvillimin ekonomik, do të forconte bashkëpunimin në fushën e tregtisë, por edhe në fushën e investime të përbashkëta dhe shkëmbimeve në aspektin e turizmit
Por në pikëpyetje mbetët zbatimi i ideve dhe iniciativave të tilla, kjo për faktin se ka pasur deklarata të shumta të lehtësimeve dhe bashkëpunimeve ekonomike nga qeveritarët e Kosovës dhe të Shqipërisë, por në praktikë janë paraqitur probleme dhe pengesa të ndryshme, krejtësisht të panevojshme.
Prandaj edhe deklarata e fundit është pritur me skepticizëm nga përfaqësues të bizneseve, të cilët kërkojnë veprime konkrete në këtë drejtim, e jo vetëm deklarata politike dhe mbledhje të dy qeverive ku bëhen deklarata të mëdha dhe zotime për të bashkëpunuar në shumë fusha.
Ata thonë se janë bërë shumë deklarata edhe në të kaluarën për bashkëpunim ekonomik, eliminim të barrierave në mes këtyre dy shteteve, por që, sipas tyre, në realitet ato nuk kanë ndodhur.
Për të pasur një bashkëpunim më të lehtë ekonomik ndërmjet Kosovës dhe Shqipërisë, ishin investuar miliarda euro në infrastrukturë. Autostrada Durrës – Kukës – Morinë që lidh Kosovën me Shqipërinë, ka lehtësuar qarkullimin e mallrave nga të dyja palët. Përveç kësaj, ndërmjet Kosovës dhe Shqipërisë janë nënshkruar disa marrëveshje për bashkëpunim ekonomik, por edhe në fusha tjera. Po ashtu, ishte nënshkruar edhe marrëveshja për nxitjen dhe mbrojtjen reciproke të investimeve.
Krijimi i pikave doganore të përbashkëta, apo krijimi i kufirit të integruar me Shqipërinë është thuajse i vonuar, kjo për faktin se Kosova tashmë ka kufi të integruar me Serbinë, proces ky i prirë nga BE dhe i ndërmjetësuar në dialogun e Brukselit.
Në kuadër të projektit të gjerë të Menaxhimit të Integruar të Kufirit në mes të Kosovës dhe Serbisë në shkurt të këtij viti ishte bërë vendosja e gurit themeltar të ndërtimit të pikës së kalimit kufitar në mes të Kosovës dhe Serbisë në Merdare.
Autoritetet në Kosovës kishin theksuar se janë ndër shtet e para të rajonit që kanë vendosur dhe zbatojë politikat e menaxhimit të integruar të kufijve si një model i avancuar të kontrollit të kufijve në mbrojtje të sovranitetit.
Lehtësimet ndërkufitare lehtësojnë jetën e shqiptarëve
Ekonomisti Lulzim Beqiri ka thënë për tesheshi.com se çfarëdo bashkëpunimi ekonomik dhe sidomos lehtësimi ndërkufitar do të ishte në të mirë të ekonomisë së dy vendeve, e në veçanti të Kosovës, pasi që i jep dalje në Adriatik. Ai thotë se nga bashkëpunimet e tilla përfitojnë në radhë të parë qytetarët e Kosovës, ndërsa thotë se politikanët që janë në pushtet nuk po bëjnë hapa konkret për bashkëpunim më të madh me Shqipërinë.
“Kryeministri Rama ka qenë iniciator i shumë përpjekjeve për bashkimin e shqiptarëve sidomos në planin ekonomik, arsim kulturë etj, mbetet shqetësuese bashkëpunimi i Kosovës me palën shqiptare sa i përket bashkëpunimit ndërkufitar, kjo edhe për hatër të BE-së, dihet që Serbia ka vrarë mbi 13 mijë qytetar civilë të pambrojtur edhe ende BE dhe disa politikanë kosovar ia bëjnë aminin Serbisë dhe BE-së, kjo nuk do koment. Mendoj që pa humbur kohë duhet të ketë lehtësira në kufirin Kosovë Shqipëri”, thotë Beqiri. /tesheshi.com/
