Dy ditë më parë, në faqen tonë elektronike, tesheshi.com, u botua një lajm i marrë nga shtypi turk, ku lajmërohej se në Tashkent, në një tubim të ministrave të Jashtëm të vendeve të Organizatës së Bashkëpunimit Islam, FETÖ, organizata që sipas autoriteteve turke ishte përgjegjëse për përpjekjen për grusht shteti të kësaj vere, qe deklaruar si një grup terrorist.
Lajmi nuk qe një kopjim, por një sjellje e shtjelluar në shqip e ngjarjes. Po atë ditë, në llogarinë në Facebook të faqes, një person anonim kishte lënë tre shënime, ku pretendonte se kishim gënjyer.
Në kërkim të ruajtjes së besueshmërisë gazetareske, si dhe të integritetit mediatik e njerëzor, u kërkua t’i
shkohej më tej çështjes. Dhe për këtë na erdhi në ndihmë një shkrim shpjegues te e përditshmja turke Yeni Şafak, si dhe botimi i rezolutës së tubimit në Tashkent në faqen zyrtare të Ministrisë së Jashtme turke.
Yeni Şafak shkruan se pas njohjes së FETÖ-s si një grup terrorist në këtë takim, anëtarë të saj kanë nisur një fushatë mohuese, duke deklaruar se nuk kishte një vendim të tillë të Organizatës për Bashkëpunim Islam.
Rezoluta e miratuar nga të gjithë ministrat e Jashtëm të vendeve anëtare të organizmit të sipërpërmendur, me përjashtim të atij të Egjiptit, e quan rrjetin një organizatë terroriste, duke bërë thirrje ndërkaq për bashkëpunim me qeverinë turke në luftën kundër saj.
E përditshmja turke e vë gishtin te një gazetar i lindur në Azerbajxhan, Mahir Zejnalov, e i dëbuar nga Turqia për lidhje me FETÖ-n, si drejtues i kësaj fushate mohuese.
Ai ka shpërndarë në rrjet deklaratën OIC/43-CFM të Tashkentit, duke shkruar gjithashtu vetë në rrjetet sociale se, “Organizmi më i madh islam i botës nuk pranon ta etiketojë lëvizjen Gylen një grup terrorist, me gjithë presionin e jashtëzakonshëm nga Turqia.”
Por në ndihmë të së vërtetës vjen një njoftim i Ministrisë së Jashtme turke, ku thuhet se njohja e grupit si terrorist gjendet në rezolutën nr. 47/43-POL.
Siç kuptohet, për të mohuar atë çfarë ka ndodhur realisht, është përdorur një dokument i ndryshëm i takimit në Tashkent të Uzbekistanit.
Pra, është e qartë se ne, tesheshi.com, as kemi gënjyer, e as kemi tentuar të gënjejmë. Thjesht, e kemi përcjellë lajmin ashtu si çdo lajm tjetër, madje pa e ngjyrosur aspak.
Rezoluta e publikuar nga Ministria e Jashtme e Turqisë, dhe e bërë e njohur dhe këtu, tregon se në ç’anë qëndron e vërteta! /tesheshi.com/
