Enda Kenny, kryeministri i Irlandës, do të deklaronte javën e kaluar në parlamentin e vendit të tij se Trump-i kishte bërë komente “raciste dhe të rrezikshme” përgjatë fushatës së tij për të siguruar kandidimin në zgjedhjet presidenciale në SHBA. Ai do të thoshte se nuk kishte në plan ta takonte atë.
Por ndërsa Trump ka lajmëruar se do të gjendet në Skoci dhe në Irlandë në javën e fundit të këtij muaji, kryeministri i Irlandës është shprehur sot i hapur për ta takuar atë, por duke e shfrytëzuar këtë mundësi për t’i thënë se pikëpamjet e tij janë raciste.
Edhe pse nuk ka patur kontakte për një takim, Kenny u ka thënë gazetarëve: “Nuk do të kisha asnjë vështirësi ta takoja Donald Trump-in.”
Dhe i pyetur nëse do ta shfrytëzonte këtë takim për të shpjeguar pse mendonte se komentet e Trump-it ishin raciste, kryeministri irlandez është përgjigjur: “Sigurisht. Do të isha shumë i lumtur!”
Propozimi i Trump-it për ndalimin e muslimanëve që të hyjnë në Shtetet e Bashkuara të Amerikës ka qenë më i debatuari, më i kundërshtuari, e që ka bërë më tepër zhurmë gjatë fushatës së tij.
Donald Trump duket ta ketë garantuar kandidimin e tij në zgjedhjet presidenciale si përfaqësues i republikanëve, pasi të gjithë rivalët e tij partiakë u tërhoqën njëri pas tjetrit nga gara. /tesheshi.com/
