Eskalimi i krizës politike në Maqedoni, ka vënë alarmin te institucionet e Bashkimit Evropian të cilat duken të shqetësuara për situatën e fundit, për çka kanë shprehur interesimin të ndihmojnë në tejkalimin e mosmarveshjeve.
Parlamenti Evropian është i gatshëm të ndërmjetësojë nëse kjo do të ndihmonte procesin, i ka thënë eurokomisari Johanes Han, kryeparlamentarit të Maqedonisë Trajko Veljanovski, në takimin e mbajtur në Shkup.
Veljanovski nga ana tjetër, ka theksuar nevojën për takime të përbashkëta me partitë evropiane, që sipas tij, do të kthente ngadalë besimin e ndërsjellë dhe do të kontribuonte për tejkalimin e mosmarëveshjeve.
Eurokomesari Han, më tej ka theksuar se në shoqëritë e pjekura demokratike debati duhet të zhvillohet në parlament, për çka ka inkurajuar opoziten të kthehet në ulëset e parlamentit.
Mësojmë se kriza politike do të jetë tema boshte e takimit mes eurokomesarit dhe kryeministrit të Maqedonisë Nikolla Gruevski, që do të zhvillohet më vonë gjatë ditës.
