Gjykata Speciale në dhjetor të këtij viti pritet tw ngrejë aktakuzat e para ndaj ish-drejtuesve të Ushtrisë Çlirimtare të Kosovës (UÇK), të cilët dyshohen se kanë kryer krime gjatë periudhës 1 janar 1998 dhe 31 dhjetor 2000.
Kështu bëjnë të ditur burime të gazetës “Zëri”, duke shtuar se një muaj më herët (në nëntor 2017) disa prokurorë specialë pritet të arrijnë në Kosovë për t’i marrë në pyetje disa nga të dyshuarit, mes të cilëve spekulohet se mund të ketë edhe figura të rëndësishme politike në Kosovë.
Zyrtarët e lartë të Dhomave të Specializuara dhe të Prokurorisë Speciale, kanë konfirmuar se tashmë janë të gatshëm edhe ligjërisht që t’i pranojnë aktakuzat e para nga Prokuroria Speciale, kurse prokurorët nuk kanë dashur të japin detaje sa i përket fazës së hetimeve dhe afateve se kur eventualisht mund të ngrihen aktakuzat.
“Faktikisht, Dhomat e Specializuara të Kosovës janë tërësisht funksionale në aspektin gjyqësor dhe të gatshme për marrjen e parashtrimeve. Tani i takon plotësisht Zyrës së Prokurorit të Specializuar të paraqesë akuza, të cilat duhet të konfirmohen nga një gjykatës i pavarur, i cili vlerëson nëse akuzat e paraqitura janë të bazuara”, ka thënë zëdhënësja e Dhomave të Specializuara, Avis Benes.
