Banka Qendrore e Kosovës ka njoftuar se ekonomia e Kosovës gjatë vitit 2014, sipas vlerësimeve paraprake të ASK-së, ka shënuar rritje reale prej 0.9 për qind. Ky vlerësim është bazuar në rritjen e investimeve prej 1.5 për qind dhe konsumit prej vetëm 1.4 për qind, ndërkohë që neto eksportet e thelluan deficitin tregtar për 3.2 për qind.
“Komponenti kryesor në kuadër të PBB-së mbetet konsumi, me pjesëmarrje prej 104.5 për qind, investimet me 27.8 për qind dhe neto eksporti me -32.3 për qind”, thuhet në raportin e Stabilitetit Financiar të Bankës Qendrore e Kosovës.
Sipas BQK-së, në përgjithësi viti 2014 është karakterizuar me rritje të konsiderueshme të remitancave me 11.8 për qind dhe rritje të kredive konsumuese me 48.7 për qind. Po sipas BQK-së, si rezultat i vendimit të Qeverisë për rritje të pagave dhe pensioneve, edhe shpenzimet rrjedhëse të Qeverisë shënuan rritje të konsiderueshme me 11.9 për qind.
Në anën tjetër është shënuar një rënie e konsiderueshme e investimeve publike me 22.3 për qind, ndërkohë që edhe investimet e huaja direkte pothuajse u përgjysmuan në vitin 2014 krahasuar me vitin 2013.
“Sektori fiskal në vitin 2014 u karakterizua me rritje të lehtë të të hyrave dhe nivel të ngjashëm të shpenzimeve krahasuar me vitin paraprak”, thuhet në raport.
Sipas BQK-së, sektori i jashtëm është karakterizuar me përkeqësim të pozicionit tregtar në vitin 2014.
Remitancat si një ndër komponentët kryesore të llogarisë rrjedhëse shënuan rritje prej 11.8 për qind në vitin 2014 dhe arritën vlerën prej 693.7 milionë eurosh.
BQK-ja ka njoftuar se sistemi financiar është karakterizuar me zgjerim të aktivitetit dhe nivel të lartë të qëndrueshmërisë në të gjithë sektorët përbërës të tij. Roli i sektorit bankar në financimin e aktivitetit ekonomik në vend është përforcuar gjatë vitit 2014.
“Në vitin 2014 u regjistruan 9 404 ndërmarrje të reja apo 16 ndërmarrje më pak sesa në vitin paraprak, ndërsa u mbyllën 1 671 biznese apo 163 biznese më shumë sesa në vitin paraprak. Struktura e ndërmarrjeve të reja të regjistruara është e ngjashme me vitin e kaluar ku dominojnë tregtia, hoteleria, prodhimi, ndërtimtaria dhe bujqësia.”
Krahasuar me vitin paraprak, është shënuar rënie e numrit të bizneseve të regjistruara tek ndërmarrjet me aktivitete të patundshmërisë prej 198 ndërmarrjesh dhe ndërtimtarisë me 140 ndërmarrje më pak të regjistruara, ndërsa hoteleria dhe prodhimi kanë shënuar rritje për 123, përkatësisht 106 ndërmarrje. Rritje kanë shënuar edhe ndërmarrjet e regjistruara në sektorin e tregtisë”, është thënë në raport, në të cilin është shtuar se sa i përket vitit 2015, pritet që ekonomia e Kosovës ta përshpejtojë ritmin e rritjes.
Kjo rritje, sipas BQK-së, pritet të gjenerohet nga kërkesa e brendshme, ndërsa neto eksportet parashihet të vazhdojnë të kenë kontribut negativ në rritjen e PBB-së.
Pavarësisht parashikimeve për rritje më të lartë të eksporteve, niveli më i lartë i importit të mallrave krahasuar me eksportin do të ndikojë që deficiti tregtar i mallrave të thellohet”, është bërë me dije në raportin e BQK-së./tesheshi.com/
