Kosova pritet të ngryset sonte në mbrëmje me një institucion të fuqishëm që do të kontrollohet nga pakica serbe, gjegjësisht nga Beogradi.
Pas vendeve të garantuara në Kuvend, Forcat e Armatosura dhe në Shërbimin Policor të Kosovës, serbet do të faktorizohen kësaj here me Asocacionin e Komunave, një organ i fuqishëm që do të kondicionojë vendimet e qeverisë së Prishtinës.
Sot në mëngjes ka nisur takimi mes Kryeministrit të Kosovës, isda Mustafa dhe atij të Serbisë, Aleksandër Vuçiç me ndërmjetësimin e shefes së diplomacisë së BE-së Federica Mogherini.
Kryeministrat e Kosovës e Serbisë u takaun në raundin e 28-të, të pestin të Isa Mustafës e Aleksandar Vuçiçit, të tretin për katër çështje: Parimet themelore për Asociacionin e komunave me shumicë serbe, kodi telefonik, energjia dhe ura mbi lumin Ibër në Mitrovicë. Ndërmjetësuesja, Përfaqësuesja e Lartë e BE-së për Politikë të Jashtme dhe Siguri, Federica Mogherinifillimisht takoi veçmas kryeministrin kosovar Mustafa, pastaj kryeministrin serb Vuçiç, për të vazhduar me takimin e përbashkët trilateral, si edhe në raundet e kaluara.
Mustafa, përmes një shkrimi të publikuar në rrjetin social Facebook, shpjegon atë që ka ndiodhur në bisedimet teknike mes delegacioneve të Prishtinës dhe Beogradit dje në Bruksel duke vlerësuar se është arritur progres.
“Gjate ditës se djeshme është biseduar në nivel teknik për energjinë, lirimin dhe lëvizjen mbi urën e Ibrit, që lidh pjesën jugore dhe veriore të Mitrovicës, dhe për parimet për themelimin e Asociacionit të Komunave me shumicë Serbe.
Jemi takuar me ekipin tonë teknik dhe në biseda të ndara edhe me përfaqësues të BE-së dhe të SHBA-së. Vlerësoj se është arritur progres i caktuar, ndërkaq janë disa çështje të cilat do t’i trajtojmë në nivel të kryeministrave të dy vendeve. Marrëveshjet që mund të arrihen janë në interes të sovranitetit të vendit dhe të integrimeve evropiane dhe euroatlantike”, ka shkruar Mustafa.
Kryeministri shkruan më tej se çështja e energjisë, Asociacionit të Komunave, Kodit Telefonik dhe lëvizjes në urën mbi lumin Ibër tashmë janë diskutuar gjatë, dhe ky fakt, sipas tij, tregon se janë trajtuar në mënyrë të hollësishme mundësitë si dhe korniza kushtetuese ligjore dhe se sipas Mustafës nuk është vepruar dhe nuk do të veprohet në arritjen me çdo kusht të asnjë marrëveshjeje.
“Ju siguroj se kemi analizuar dhe kemi konsultuar ekspertizën e brendshme dhe ndërkombëtare për çdo temë dhe për çdo element të saj dhe se do të kërkojmë rrugëzgjidhje e cila krijon prosperitet për vendin, fuqizim të rendit kushtetues dhe progres ekonomik”, shkruan Mustafa.
Ai tha se në Bruksel nuk kanë shkuar për të bërë fushatë. “Këtu nuk kemi ardhur të bëjmë fushatë, gjendemi këtu të zgjidhim problemet, të cila pesëmbëdhjetë vjet me radhë po e ngufasin Kosovën dhe po na paralizojnë të merremi me çështjet tona jetike. Paralizimi i pavarësisë dhe funksionalitetit të shtetit të Kosovës iu konvenon vetëm atyre që akoma jetojnë me mendësinë e së kaluarës, por besoj se ka ardhur koha të hiqet dorë nga kjo mendësi”, shkruan në fund Mustafa.
/tesheshi.com/
