Ministrat e Arsimit të Kosovës dhe Shqipërisë, përkatësosht Shyqiri Bytyçi dhe Lindita Nikolla kanë rënë dakort që të dy vendet të vazhdojnë edhe më tej bashkëpunimin sa i përket kurrikulave të përbashkëta. Gjithashtu ministrat angazhohen edhe në integrimin e përbashkët të sistemit të arsimit në Bashkimin Evropian.
Ministri Bytyçi, me këtë rast ka shprehur gatishmërinë e tij për angazhim të përbashkët edhe sa i përket përmirësimit të kualitetit në arsim.
“Jemi të interesuar që të vazhdojmë bashkëpunimin i cili tashmë ka dhënë frytet e para të një bashkëpunimi serioz. Është filluar një bashkëpunim i mirë në fushën e kurrikulave, të cilat po zbatohen në të dy vendet. Kemi akoma për të bërë edhe sa i përket ngritjes së cilësisë. Jam në dijeni lidhur me sfidat që vazhdojnë të jenë pjesë e sistemit të arsimit, por me një angazhim të përbashkët do të tejkalohen të gjitha problemet”, tha Bytycci.
Ndërsa, ministrja Nikolla pasi uroi ministrin Bytyçi për marrjen e detyrës, ka thënë se, Kosova dhe Shqipëria do të vazhdojnë edhe më tej traditën e bashkëpunimit dhe këmbimit të përvojave të mira në arsim, këmbimit të profesorëve, ekspertëve dhe bashkëpunime në aspekte të tjera të cilat ndërlidhen me standardet e cilësisë në arsim.
