Nga Bashkim Kastrati
Komunat me shumicë serbe që udhëhiqen nga “lista serbe” nuk po bashkëpunojnë me Agjencinë Kosovare të Privatizimit (AKP). Ky institucion nuk ka mundur të kompletojë listën e aseteve të pashitura, të cilat i ka publikuar në ueb-faqen zyrtare të tyre për shkak të refuzimit të disa prej komunave për të ndarë dokumentet e nevojshme të aseteve të ndërmarrjeve shoqërore që gjenden nëpër komunat me shumicë serbe.
Gjithashtu komunat që udhëhiqen nga kryetar që vijnë nga “lista serbe” kanë refuzuar të kryejnë edhe ndërrimin e pronësisë të aseteve të ndërmarrjeve shoqërore në Komunën e Ranillugut.
Duke marrë parasysh këtë situatë BE-ja është angazhuar për të ndihmuar dhe lehtësuar komunikimin në mes të AKP-së dhe kryetarëve të komunave me shumicë serbe. Por takimi kishte dështuar pasi kryetarët e komunave ishin tërhequr. Ata kanë mbajtur qëndrimin se nuk do të lejojnë, siç e quajnë ata, “privatizimin e njëanshëm”.
Analisti Blerim Burjani ka thënë për tesheshi.com se tema e privatizimit është një temë rezistuese për shkak se Serbia dëshiron të ruajë ndikimin në një pjesë të pronës së Kosovës. Ai thotë se tema e privatizimit është e papranueshme për shtetin serb për shkak apetiteve ndaj aseteve të Kosovës.
“Kjo temë dëshirohet të nxitët për dialog të Brukselit, këtu është elementi kyç i mosbashkëpunimit të komunave serbe në shtetin e Kosovës, është nxitur nga Serbia të pengohet puna e AKP-së. Pra ideja serbe është të shkohet në Bruksel e të diskutohet gjere e gjatë për procesin e privatizimit pra shndërrohet në temë politike”, thotë Burjani.
Ai thotë se krijimi i asociacionit të komunave me shumicë serbe vetëm sa do ta forcojë këtë rezistencë dhe bojkot ndaj institucioneve të Kosovës.
“Po kjo është e qartë se ky asociacion po themelohet për këtë arsye që të koordinohen me serbet e Kosovës dhe më lehtë me shtetin serb, për t’u rezistuar gjithmonë institucioneve të Kosovës”, theksoi Burjani.
Asetet shtetërore që gjenden në këto komuna mund të përfundojnë në dialogun e Brukselit
Opinionisti Kushtrim Gashi, ka thënë për tesheshi.com se komunat me shumicë serbe që udhëhiqen nga “lista serbe” nuk bashkëpunojnë me Agjencinë Kosovare të Privatizimit sepse janë te ndikuara direkt nga Beogradi. Ai thotë se Qeveria e Serbisë është ajo që kundërshton privatizimin e ndërmarrjeve shoqërore në Kosove dhe çelësi i krejt këtij procesi është presioni mbi qeverinë e Serbisë.
“Bashkimi Evropian nëse vërtetë do te kishte interesim të njëmend do të mund ta zgjidhte ketë çështje. Në njërën anë duke iu bërë presion qeverisë se Serbisë që të mos e bllokojë këtë proces, ndërsa në anën tjetër duke lehtësuar komunikimin në mes kryetareve të komunave me shumicë serbe dhe AKP-së”, thotë Gashi.
Sipas tij, rreziku më i madh në ketë proces qëndron në atë se asetet e ndërmarrjeve shoqërore në komunat me shumicë serbe shumë lehtë mund të përfundojnë si temë e re e negociatave mes Kosovës dhe Serbisë, gjë që do ta dëmtonte shumë ekonominë e Kosovës.
Qeveria aktuale nuk po i reziston politikës destruktive të Serbisë
Opinionisti Krenar Shala, ka thënë për tesheshi.com se Qeveria e Serbisë përmes “listës serbe” po vazhdon ndikimin e saj në Kosovë dhe se nuk ka asnjë ndryshim nga politika e saj destruktive karshi Kosovës.
Ai thotë se Qeveria aktuale nuk është duke iu kundërvënë si duhet politikave të Serbisë dhe se duke e marrë parasysh këtë, është e domosdoshme që të krijohet një qeveri e re, e cila do ta ndryshonte kursin politik ndaj Beogradit zyrtar dhe ndaj dialogut që po zhvillohet me ndërmjetësimin e Bashkimit Evropian.
“Dihet mirëfilli që marrëveshja e Brukselit i ka dhenë të drejta politike Beogradit përmes “listës serbe”. Normalisht që Beogradi e ka synim sabotimin e shtetësisë së Kosovës, ashtu siç edhe e ka proklamuar në kuadër të strategjisë për politike të jashtme. Në ketë kontekst, nuk besoj që do të ketë ndërrim të kësaj politike nga ana e Beogradit për sa kohë qytetarët e Kosovës nuk e zgjedhin një Qeveri që përkushtohet për zhvillim të brendshëm cilësor, si mënyra e vetme për t’i rezistuar kësaj politike destruktive të Beogradit”, thotë Shala.
Procesi i privatizimit në Kosovë ka filluar në vitin 2003 dhe deri më tani janë shitur 1290 asete të ndryshme të ndërmarrjeve shoqërore me një vlerë prej mbi 660 milionë euro. Por, edhe pas 13 vitesh, të pa shitura kanë mbetur edhe 1865 asete. Prej tyre, 1685 prona janë brenda territorit të Kosovës, kurse 180 prej tyre janë jashtë vendit. Numri më i madh i kontratave të nënshkruara është në Prishtinë (325 asete ), me një vlerë prej 250 milionë euro.
Sipas një raporti të publikuar nga Agjencia Kosovare të Privatizimit, gjatë këtij procesi numri më i madh i pronave të shitura, apo mbi 300 janë lokale, pasuar nga tokat bujqësore, kurse 143 janë fabrika./tesheshi.com/
