Me përfundimin e vlerësimit financiar për dosjet e ’95-s, Agjencia e Trajtimit të Pronave ka ndërmarrë hapin e radhës, duke marrë në shqyrtim vendimet që datojnë një vit më vonë.
Kështu, pronarët me dosje të ’96-s, shumë shpejt do të kenë mundësi të njihen me masën e përfitimit. Procesi i vlerësimit kalon përmes një skaneri, në të cilin verifikohet në mënyrë të detajuar i gjithë dokumentacioni që dosja përmban.
Për çdo sipërfaqe truall të njohur, do të hidhet dritë mbi statusin që kjo pronë ka pasur në kohën e konfiskimit. Pra, do të jetë zëri kadastral i origjinës që do të merret si referues për caktimin e vlerës së kompensimit, ndërsa çmimet për metër katror që do të aplikohen do të jenë të sotmet.
“ATP-ja është në proces pune për vlerësimin financiar të të gjitha vendimeve që kanë njohur të drejtën e kompensimit për vitin 1996. Vlerësimi bëhet nga grupet e punës të ngritura për shqyrtimin e dosjes, duke iu referuar dokumentit ligjor dhe hartografik për të përcaktuar zërin kadastral të origjinës në momentin e shpronësimit.
Pas përfundimit të këtij procesi, në faqen zyrtare të ATP-së do të bëhet publikimi i vlerësimit financiar. Pas kësaj, jeni të lutur të paraqisni dokumentacionin sipas përcaktimit të ligjit 133/2015, si dhe VKM për kompensimin financiar 223, datë 23.03.2016”, bën me dije Agjencia e Trajtimit të Pronave. Aktualisht, të drejtën e aplikimit e kanë të gjitha ato familje që kanë në duar vendime para ’95-s, për të cilat është mbyllur faza e parë, ajo e vlerësimit ekonomik.
U desh më shumë se një vit kohë që ATP-ja të dilte me një faturë për 6838 dosje që datojnë në 1995. Në muajin maj u publikua edhe regjistri, në të cilin janë pasqyruar të dhënat për çdo vendim. Zyrtarisht u tha se nga ndryshimi i zërit kadastral preken vetëm 326 familje, shkruan Panorama.
Por, duke iu referuar të dhënave të bëra publike në faqen zyrtare të agjencisë, rezulton se shifra e pronarëve që penalizohen është shumë herë më e lartë. Kostoja e humbjes është e lartë, veçanërisht për ato familje të cilave u është kthyer një pjesë e pronës. Kjo kategori është kategorizuar në listën “e ezauruar”.
Ligji i ri i shpërblen vetëm me diferencën mes vlerës së pronës së mbetur për kompensim dhe asaj që është kthyer. Nëse rezulton që vlera e pronës së kthyer është më e madhe se ajo që ka mbetur, atëherë këto familje konsiderohen të kompensuara dhe fatura zerohet.
Familjeve pronare që u është përllogaritur masa e përfitimit me skemën e re të kompensimit, kanë të drejtë të paraqiten në ATP për të aplikuar në një nga skemat e kompensimit.
Në 6-mujorin e parë të vitit, 360 familje patën mundësi të marrin paratë e kompensimit. Fondi financiar ka mbërritur pothuajse në limite, çka do të thotë se ritmet e pagesave do të jenë të ulëta. Por krahas kompensimit në të holla, është edhe fondi fizik. Agjencia ka në dispozicion 23 mijë ha tokë, si edhe 176 objekte shtetërore. /tesheshi.com/
