Imazhet e një udhëtari të nxjerrë me dhunë nga një avion i kompanisë ajrore United Airlines ditë më parë kanë provokuar një valë të paparë kritikash, duke i detyruar drejtuesit e kësaj kompanie të kërkojnë falje për incidentin.
Vetë shefi ekzekutiv i United Airlines-it ka kërkuar ndjesë dhe ka premtuar rishikim të plotë të praktikave të kompanisë ajrore.
“Vazhdoj të jem i shqetësuar nga çka ngjau në atë fluturim, dhe i kërkoj thellësisht ndjesë udhëtarit të nxjerrë forcërisht dhe pasagjerëve të tjerë që gjendeshin në avion. Dua që ta dini se ne marrim përgjegjësinë e plotë…”
Në një reagim të mëhershëm të kompanisë ajrore në lidhje me ngjarjen, udhëtari në fjalë ishte cilësuar si problematik.
Incidenti ndodhi të dielën, në një fluturim nga Çikagoja për në Luivill, dhe pasagjeri pamjet e të cilit u bënë të njohura në mbarë botën ishte një prej katër udhëtarëve të nxjerrë me detyrim nga avioni për t’i bërë vend ekuipazhit pas tejmbushjes së kapacitetit mbajtës. /tesheshi.com/
