Komandant i KFOR-it në Kosovë, Gjeneral Italian Francesco Paolo Figliuolo, sot rreth mesditës ka qëndruar në Mitrovicë.
Figliuolo ka qëndruar për pakë kohë mbi urën kryesore të lumit ‘Ibër’, aty ku është vendosur nga serbët lokalë dhe “Qeveria e Beogradit”, barrikada e ashtuquajtura ‘Parku i Paqes’.
Vizita e komandantit të misionit të NATO-së për Kosovë KFOR, është përcjellë nën masa të rrepta të sigurisë, duke mos dhënë asnjë prononcim zyrtarë e as për media.
Ndërsa që tek qytetarët mitrovicas, kalimtarë të rastit, është zgjuar kureshtja mbi qëllimin e kësaj vizite të komandantit të KFOR-it, Francesco Paolo Figliuolo.
Gjenerali Italian Figliuolo nuk ka dashur të prononcohet për media rreth qëllimit të vizitës së tij në urën e lumit ‘Ibër”.
Në anën tjetër, burime të portalit ‘tesheshi’, nga misioni i NATO-së në Kosovë, me kusht të anonimitetit, kanë theksuar se “sheshet dhe parqet që janë vendosur ilegalisht vitin e kaluar në Mitrovicë si ‘Parku i Paqes’ në urën kryesore mbi lumin ‘Ibër’, sheshi ‘Adem Jashari’ në lagjen e boshnjakëve dhe sheshi I ‘UÇK-së’ në Suhodoll, pritet që të largohen”.
Burimi ka shtuar se largimi i këtyre shesheve dhe parqeve pritet të bëhet gjatë muajit qershor, pasi që negociatorët e Kosovës dhe ata të Serbisë janë marr vesh në Bruksel për një largim të këtyre pengesave.
“Këto barrikada janë bërë pengesë për krijimin e një gjendje më të relaksuar në Mitrovicë, si dhe për të mundësuar një lëvizje dhe qarkullim të lirë mallra dhe qytetarëve në qytetin e ndarë në dysh”, ka thënë burimi.
Burimi i portalit “tesheshi’ nga KFOR-i, nuk ka pranuar që të komentojë vizitën e Komandantit të KFOR-it në Mitrovicë, por ka shtuar se Mitrovica do të jetë qytet shumë atraktiv.
Gjatë dhe para vizitës së Komandantit të KFOR-it, mbi qytetin e Mitrovicës kanë fluturuar helikopterët e KFOR-it. /tesheshi.com/
