Organizata Botërore e Shëndetësisë (OBSH) raportoi një rritje të mprehtë të numrit të rasteve të kolerës dhe vdekjeve në mbarë botën në nëntor në krahasim me vitin e kaluar, sipas raportit të fundit të publikuar të mërkurën.
“Nga 1 janari deri më 24 nëntor, 733,956 raste të kolerës dhe 5,162 vdekje u raportuan në 33 vende në pesë rajone të OBSH-së”, thuhet në raport.
Shtohet se në nëntor 2024 është shënuar rritje e numrit të rasteve me 37 për qind dhe numri i vdekjeve me 27 për qind krahasuar me të njëjtën periudhë të vitit të kaluar.
Raporti vë në dukje se faktorë të tillë si konflikti, zhvendosja masive, fatkeqësitë natyrore dhe ndryshimet klimatike po intensifikojnë shpërthimet e kolerës, veçanërisht në rajonet rurale dhe të prekura nga përmbytjet. Infrastruktura e dobët dhe aksesi i kufizuar në kujdesin shëndetësor në këto zona e përkeqësojnë krizën duke vonuar trajtimin dhe duke rritur numrin e vdekjeve.
“Natyra ndërkufitare e epidemive ndërlikon më tej përpjekjet e kontrollit, duke paraqitur sfida të rëndësishme për sistemet globale shëndetësore”, thuhet në raport.
Raportin shton se nëntori pati prodhimin më të lartë të vaksinave orale të kolerës (OCV) që nga viti 2013 për shkak të formulimeve të reja dhe teknikave të prodhimit të parakualifikuara për vitin 2024. Ky progres rriti furnizimet mesatare mujore në 3.5 milionë doza, një rritje e konsiderueshme në krahasim me 600,000 në tetor.
Megjithatë, OBSH ka paralajmëruar se prodhimi global i vaksinave mbetet shumë më poshtë se pesë milionë dozat e nevojshme për të mbajtur furnizime efektive emergjente.
“Kjo mungesë e vazhdueshme vazhdon të pengojë përpjekjet për të kontrolluar shpërthimet e kolerës dhe për t’iu përgjigjur shpejt përhapjes së sëmundjes,” paralajmëroi OBSH, duke nënvizuar nevojën urgjente për të rritur prodhimin e vaksinave për të përmbushur kërkesën në rritje globale. /tesheshi.com/
