Nga Donat Maloku
Agjencia kundër Korrupsionit ka publikuar të hënën pasdite në faqen zyrtare të saj në internet regjistrat e deklarimit të rregullt vjetor të pasurisë së zyrtareve të lartë publik, në pajtim me Ligjin për Deklarimin, prejardhjen dhe kontrollin e pasurisë, dhe deklarimin, prejardhjen dhe kontrollin e dhuratave.
Si edhe çdo vit tjetër pasuria e shumicës së zyrtarëve të shtetit është rritur. Atyre u është trashur xhepi. Përveç, që kanë shtëpi, banesa, para të deponuara në bankë, janë aksionarë në kompani, ata kanë edhe vetura tejet të shtrenja mijëra euro.
Portali mbarëkombëtar ‘tesheshi.com’, ka vëzhguar formularët e pasurisë së disa prej zyrtarëve të lartë të shtetit, dhe është marrë në veçanti me veturat që posedojnë që nga presidentja, kryekuvendari, ministrant dhe deputetët.
Vetura më e shtrenjtë 45 mijë euro, më e lira 3000 euro
Kampion për ‘veturë më të shtrenjtë’, është ministri i Punëve të Brendshme, Skënder Hyseni, funksionar i lartë i LDK-së.
Hyseni mund të mburret pasi posedon veturën më të shtrenjtë nga kolegët. Ai ka veturë të tipit Audi në vlerë 45 mijë euro, të cilët thotë se e ka blerë nga kursimet në vitin 2012.
Me të vërtetë, Hyseni sipas deklarimit duket të jetë edhe një kursimtar shumë i madh në të kundërtën nuk do ta kishte këtë veturë luksoze.
Opozitari Fatmir Limaj, kryetar i partisë NISMA për Kosovën, ish ministër i Transportit dhe Telekomit të Kosovës.
Edhe Limaj, ka markë të njëjtë të veturës, Audi (A6), e cila kushton hiç më pak se 30 mijë euro. Limaj, në formularin e deklarimit të pasurisë ka shkruar se këtë veturë e ka blerë nga shitja paraprake e veturës por nuk e ka cekur se çfarë veture ka shitur dhe se çfarë vlere ka pasur.
Teuta Rugova, vajza e ish presidentit Ibrahim Rugova, poashtu ka një veturë tejet te shtrenjtë edhe pse nuk dihet se çfarë tipi është ajo. Vetura e saj kushton 25 mijë euro, derisa thotë se e ka blerë nga kursimet në vitin 2012.
Ministri i Drejtësisë Hajredin Kuçi ka deklaruar dy vetura një në pronësi personale dhe një në pronësi të gruas. Veturës së tij të cilës nuk ia ka treguar markën i ka vënë vlerën 18 mijë euro të cilën thotë e ka blerë me kredi dhe ndërrim të veturës paraprake.
Kurse, veturën e bashkëshortes që poashtu nuk ka treguar çfarë tipi është, kushton 8500 euro dhe poashtu ka thënë se e ka blerë me kredi dhe ndërrim të veturës paraprake.
Lutfi Zharku, ministër i Infrastrukturës, fuksionar i lartë i LDK-së siç duket i pëlqen tej mase vetura e tipit Mercedes. Ai për t’ia plotësuar dëshirën vetës, ka shpenzuar hiq më pak se 17.800 euro për ta blerë një veturë Mercedes ML 320.
Presidentja Atifete Jahjaga në vitin 2011 kur ishte bërë presidene kishte deklaruar për herë të parë veturë të tipit Golf 2, në vlerë rreth dy mijë euro. Por, situata ka ndryshuar tërësisht pas katër vitesh, kuptohet për të mire. Ajo më nuk e posedon Golfin, por veturë tejet luksoze Shkoda New Octavia 1.6 TD në vlerë 16.500 të cilët thotë ta ketë blerë me kontratë financiare me afat 60 muaj.
Kryekuvendari Kadri Veseli ka deklaruar një veturë Xhip në vlerë 16.300 euro, në pronësi të bashkëshortes së tij, të cilën thotë se e ka blerë në vitin 2014 ngas kursimet.
Ministri i Jashtëm Hashim Thaçi, ish kryeministër i Kosovës dhe kryetar i Partisë Demokratike të Kosovës (PDK), sipas deklarimit të pasurisë nuk ka veturë personale, Ai ka deklaruar një veturë të tipit Pasat në vlerë 13 mijë euro në pronësi të bashkëshortes së tij të cilën ka shkruar se e ka blerë nga kursimet në vitin 2010.
Ministrja pa portofol, Edita Tahiri, gjithashtu posedon një veturë të shtrenjtë Opel Astra në vlerë 12 mijë euro të cilën e ka blerë në vitin 2007.
Ministri i Forcës së Sigurisë së Kosovës, Haki Demolli, është një tjetër zyrtarë i LDK-së që ka blerë një veturë luksoze. Opel Zafira është vetura 10 mijë euro që e ka blerë Demolli.
Për dallim nga kolegët ministra, Blerand Stavileci ministër i Zhvillimit Ekonomik posedon një veturë shumë më të lirë. Ai ka deklaruar në pronësi veturë të tipit Opel Astra në vlerë 5 mijë euro.
Veturë edhe më të lirë ka deklaruar ministri i Diasporës Valon Murati i cili posedon makinë Citroen që kushton vetëm 3000 euro të cilën e ka blerë në vitin 2006.
Ministri i Administratë Publike Mahir Yagxhilar ka deklaruar veturë të markës Renault Modus që kushton 6000 euro, të cilën e ka blerë me kredi në vitin 2012.
Nënkryetari i Kuvendit të Kosovës Xhavit Haliti ka deklaruar veturë Xhip Land Rover në vlerë 7000 euro.
Ish kryetari i Kuvendit, Jakup Krasniqi edhe këtë vit, si në vitin e kaluar ka deklaruar veturën Chevrelet të cilën e ka shkruar se e ka dhuratë nga vëllau.
Ja veturat e shefave të Grupeve parlamentare të partive politike:
Si ministrat, ashtu edhe shefat e Grupeve Parlamentare të partive politike kanë vetura tejet të shtrenja dhe luksoze.
Shefi i GP të PDK-së Adem Grabovci ka deklaruar veturë BMW, e blerë në vitin 2013, siç e ka shkruar (Nga sigurimi kasko i Mersedesit pas aksidentit dhe ngakursimet).
Kryetari i GP të LDK-së Ismet Beqiri posedon veturë në vlerë 6000 euro të cilën e ka blerë në vitin 2012, por nuk ka treguar markën e saj.
Shefi i GP të Lëvizjes “Vetëvendosje”, Glauk Konjufca ka veturë më të shtrenjtë se Beqiri, pasi kushton 7300 euro, të cilën thotë se e ka blerë nga kursimet ne vitin 2015.
/tesheshi.com/
