Nga Donat Maloku
Automjetet e shtetit, të punësuarit në institucionet e Kosovës po i përdorin e keqpërdorin në vazhdimësi.
Përkundër fushatës së medieve kundër kësaj dukurie dhe tërheqjes së vërejtjes nga kryeministri Isa Mustafa, ata vazhdojnë që këto automjete t’i keqpërdorin.
Për këto keqpërdorime vërejtjet e tij i ka dhënë edhe Auditi i Përgjithshëm ku ka konstatuar dobësi sistematike në menaxhimin e automjeteve.
“MAP nuk ka vënë në funksion kontrolle adekuate për menaxhimin e automjeteve zyrtare. Nuk mbahen evidenca të rregullta që arsyetojnë shfrytëzimin e automjeteve, fletë udhëtimet apo dokumentet e nevojshme për regjistrimin e kilometrave dhe shpenzimeve të realizuara. Në shtatë (7) mostra mungonin raportet. Ndërsa, nuk mbahet asnjë evidencë lidhur me kilometrat e kaluara dhe karburantet e shpenzuara për veturat e Kabinetit të Ministrit dhe Këshilltarëve politik”, është e gjetura e Auditorit.
Ministri i Administratës Publike, Mahir Yagcilar, ka pranuar gjetjet e Auditorit të Përgjithshëm për mirëmbajtjen dhe riparimin e automjeteve zyrtare.
Yagxhilar të martën në Komisionin kuvendar për Mbikëqyrjen e Financave Publike se raporti përmban të dhëna të sakta për përdorimin e veturave zyrtare për vitin 2014,
Keqpërdorimi i automjeteve zyrtare, shuma e lartë e shpenzimeve të tyre, mungesa e mbajtjes së të dhënave për pjesët e ndërruara, mungesa e çmimeve referente dhe koordinimi i paefektshëm brenda dhe në mes organizatave buxhetore individuale, ishin çështje që u biseduan nga anëtarët e Komisionit.
Bazuar në raportin e ZAP-it, u tha se çmimet e artikujve të blerë janë të kushtueshme krahasuar me ofertat tjera, ndërkaq duke përmendur dhe kritikuar mangësitë që po hasën në prokurim lidhur me trajtimin e mirëmbajtjes dhe riparimit të automjeteve, anëtarët e Komisionit kërkuan sqarime nga ministri lidhur me vlerën e lartë të riparimeve të këtyre mjeteve. Ata kërkuan që paraprakisht të bëhet hulumtimi i tregut sa i përket çmimeve për servisim të automjeteve dhe se duhet të posedohet regjistri i saktë nga insistucionet për mjetet e ndrruara.
Menaxhimi i automjeteve s’është çështje e lehtë
Ministri i MAP-it, Mahir Yagcilar ka deklaruar se menaxhimi lidhur me këto çështje has në vështirësi, duke thënë se duhet të formohet një ekip nga të gjitha institucionet për gjetjen e një zgjidhjeje.
“Menaxhimi i automjeteve nuk është çështje e lehtë. S’ka pasur një analizë të mirëfilltë të mirëmbajtjes dhe riparimit të automjeteve zyrtare. Ne si MAP kemi zvogëluar koston e shpenzimeve në lidhje me mirëmbajtjen dhe riparimin e automjeteve.Ka ndodhur një zvogëlim por prap ka pasur mangësi në menaxhim”, ka pohuar Yagcilar, ndërsa ka shtuar se MAP-i do të veprojë sipas rekomandimeve të ZAP-it.
Ai ka thënë se në treg gjenden lloje të ndryshme të veturave dhe çmimi i tyre ndërrohet prejt vitit në vit.
“Këtë çështje nuk mundet me rregullu vetëm nga një institucion, duhet të krijohet një ekip në nivelin institucion dhe qeveritar të kemi njëdatabazë të gjithë nevojave. Duhet ta krijojmë një çasje ndryshe sa i përket tenderimit dhe mirëmbajtjeve të autmjeteve. Me vjetërsinë e autmjeteve rriten shepnzimet. Nëse vazhdo trendi i përdorimit të veturave të vjetra shpenzimet jo që do të ulen por ato do të rriten. MAP mban evidencën dhe posedon të dhënat për pjeset e ndërruara dhe të riparuara”, ka deklaruar Yagcilar.
Pas këtij diskutimi , Komisioni vlerësoi se kjo çështje duhet të procedohet për diskutim edhe në seancë plenare.
Ndryshe, në mbledhjen e Qeverisë të datës 4 maj, 2015, kryeministri Isa Mustafa pati folur rreth keqpërdorimit të veturave zyrtare gjatë festës së 1 Majit.
Sipas Mustafës, kjo dukuri nuk duhet lejuar ndërkaq ka kërkuar nga ministri i Punëve të Brendshme që herëve tjera këto vetura të ndalohen dhe, nëse nuk janë të autorizuar që janë duke udhëtuar zyrtarisht, të kthehen prapa. /tesheshi.com/
