Edhe pse konstituimi i Kuvendit të Kosovës u shoqërua me zvarritje dhe bllokada të paarsyeshme të krijuara nga partitë politike, institucioni më i lartë ligjvënës ende nuk është tërësisht funksional.
Instituti Demokratik i Kosovës, organizatë kjo që monitoron punën e Kuvendit, thotë se grupet parlamentare përveç ndarjes së komisioneve, nuk kanë marrë mundin të propozojnë emrat e kryetarëve të komisioneve, të nënkryetarëve dhe të anëtarëve të tyre, ndërsa shton se formimi i komisioneve parlamentare si trupa punuese të Kuvendit, është parakusht për funksionalizimin e këtij institucioni.
Në anën tjetër, KDI kritikon Kryesinë e Kuvendit e cila thotë se nuk është angazhuar në përshpejtimin e këtij procesi të rëndësishëm.
“Fillimi i fushatës për zgjedhjet lokale ka bërë që partitë politike të orientohen në fushatë duke anashkaluar tërësisht punën në Kuvend. Shumë nga deputetët e Kuvendit janë edhe kandidatë për kryetarë të komunave, ndërsa të tjerë kanë marrë role të caktuara në shtabet zgjedhore të partive politike.
Gjendja ekzistuese po u përshtatet të gjitha partive politike parlamentare, prandaj po neglizhohet qëllimshëm. Nga mungesa e ushtrimit të rolit të Kuvendit tashmë janë shkaktuar shumë dëme, disa prej të cilave mund të sanohen vetëm me një Kuvend tërësisht funksional dhe dinamik”, thuhet në deklaratën e KDI-së.
Instituti kërkon nga partitë politike parlamentare që të balancojnë kohën e tyre për fushatë zgjedhore me detyrat dhe përgjegjësitë që kanë në Kuvend, të funksionalizojnë këtë institucion dhe të përpiqen të punojnë me përkushtim për të mirën e qytetarëve. /tesheshi.com/
