Prishtinë – Vetëm pak kohë pasi është publikuar rezultati i zgjedhjeve, sipas të cilit, kandidati i vetëm për kryetar të Vetëvendosjes, Visar Ymeri, ka marrë 96.42 përqind të votave, kanë shpërthyer talljet në Facebook nga gazetarët dhe analistët politik.
Gjatë ditës së sotme, analisti politik, Astrit Gashi, nëpërmjet një statusi në faqen e tij në Facebook, ka pyetur nëse është kryer apo jo numërimi i votave dhe nëse është zgjedhur kryetar Visari?“Nëse del me më shumë se 70 për qind të votave më mirë as mos na tregoni. Me 90 për qind hiq se hiq!! Popullit nuk po i pritet që ta merr vesh këtë informate!!”, patë shkruar ai, ndërsa, vetëm pak kohë pasi janë publikuar rezultatet, Gashi ka shkruar rezultatin e zgjedhjeve, pa dhënë ndonjë koment për këtë.
Votimi për Kandidatin për Kryetar të Lëvizjes Vetëvendosje, Visar Ymeri: Për: 96.42%. Kundër: 1.88%, Abstenim: 1.32%, Të pavlefshme: 0.37%”, ka shkruar ai.
Duke e publikuar rezultatin e zgjedhjeve, me të dhënat e tij ka ironizuar edhe ish-deputeti i Partisë Demokratike të Kosovës, Berat Buzhala, i cili, tash për tash, prezantohet si analist i pavarur, ndërsa shpesh jep opinione kritike si për ish-partinë e tij, gjithashtu edhe për partitë opozitare.
“Mirë është tash ai komisioni disiplinor i Lëvizjes Vetëvendosje, me në krye kapterrin Bojken Abazi, të hulumtojë për t’i gjetur nga një nga një këta 1.88 për qind që kanë votuar kundër”, ka shkruar ai në faqen e tij në Facebook.
Për mënyrën se si është zgjedhur Ymeri, ka ironizuar edhe analisti politik, Imer Mushkolaj. “Me u zgjedh kryetar pa kundërkandidat është si ta fitosh tenderin me një ofertues”, ka shkruar ai gjatë ditës. Ndërsa, aktori Jeton Zogjani, ka publikuar një foto të diktatorit të Koresë Veriore, Kim Jong Un, me të cilën, sipas shkrimit të shkruar në gjuhën shqipe, që është i montuar, diktatori pyet me arrogancë një ushtarak se kush është Visar Ymeri – që do të thotë, edhe vetë lideri koreano-verior e xhelozon për rezultatin e zgjedhjeve liderin e ri të Vetëvendosjes.
“Visar Ymeri në krye të Vetëvendosjes me 96.42 për qind të votave, krejt nanush…a dëgjuat? Ne ahengun qe po e organizonte Vetëvendosje, Arif Vladin po e marrshin që të këndojë, se ja kish pas marr dorën në kohen e Xhaxhit (Enver Hoxhës)”, ka shkruar ai./TeSheshi/
