Gazetari Halil Matoshi beson se lideri i ri i Vetëvendosjes, Visar Ymeri, do të humbasë votues potencial, por do të jetë më i pranueshëm nga ndërkombëtarët sesa “lideri në ikje”, Albin Kurti. Ai thotë se partitë që s’kanë kundërkandidat s’kanë konkurrencë dhe as cilësi
Zekirja Shabani
Prishtinë – Zgjedhja e Visar Ymerit në krye të Vetëvendosjes me rezultat 96.42 për qind është manifestim i entuziazmit të turmave e jo zgjedhje demokratike – dhe si e tillë lë shije të keqe.
Kështu mendon gazetari Halil Matoshi, i cili gjatë një bisede për portalin TeSheshi ka theksuar se megjithatë anëtarët dhe drejtuesit e partive tjera nuk kanë të drejtë ta kritikojnë Vetëvendosjen për mungesë demokracie – ngase, as vetë nuk janë më mirë.
“E para, nuk po më pëlqen fare hipokrizia e partive tjera kosovare, të njohura për mungesë demokracie të brendshme, të njohura si parti liderësh e krahinash, të njohura për nga shterpësia e ideve, qe i janë turrë Lëvizjes Vetëvendosje kinse për mungesë demokracie. E vërteta është se tërë spektri politik kosovar ka deficite demokratike, mirëpo duhet rikujtuar se në të gjitha partitë aktuale kosovare lideri merr thuaja të njëjtën kuotë votash dhe asnjëherë nuk kanë kundërkandidatë. Në anën tjetër, fitorja e Visar Imerit prej 96.42 % është manifestim i entuziazmit të turmave – jo zgjedhje demokratike – dhe lë natyrisht shije të keqe”, thotë ai.
Matshi insiston se arsyetimi i drejtuesve të Vetëvendosjes se fletëvotimi i kishte opsionet “abstenim” dhe “kundër”, nuk është kurrfarë argumenti se bëhet fjalë për një proces demokratik.
“Jo ky nuk është fakt që dëshmon demokracinë, kjo është vetëm maskim i demokracisë, sepse thjesht, edhe nëse shumë parti të mëdha demokratike evropiane kanë vetëm një kandidat, ai së pari qitet në sitë e në shoshë brenda strukturave të partisë”, thekson Matoshi.
Ky gazetar thekson se partia, e cila, megjithatë identifikohet tashmë me ish-liderin, Albin Kurti, nuk mund ta mohojë një fakt, që sipas tij është: pa konkurrencë nuk ka cilësi.
“Dhe cilësia është ajo që u mungon partive politike kosovare. Sepse kanë fare pak ose nuk kanë hiq njerëz që prodhojnë ide, politika të mira për shekullin njëzetenjë”, nënvizon ai.
Matoshi thotë se ka qenë e pamundur që rezultati të ishte ndryshe, aq më pak që për liderin e ri të kishin votuar rreth gjashtëdhjetë për qind, dhe dyzet për qind kundër.
“Vetëvendosja shitet në publik se socialdemokrate e në thelb është populliste, madje në disa parametra edhe nacionaliste dhe në këso partish monolite të padëgjueshmit në radhët partiake rëndom filtrohen, përkatësisht spastrohen përmes komiteteve për moral e disiplinë e ‘milicive’ të ngjashme brendapartiake. Pra nuk mund të ekzistojë kurrë ai dyzet për qindshi kundër”, thotë ai.
Madje, sipas tij, e keqja është se partitë, sikurse Vetëvendosja, rëndom thirren në emër të popullit, ndonëse fuqia e votës nuk ua jep një luks të tillë.
“Pra ‘veprimi shpërthyes’ në emër të popullit është rrezik për demokracinë, sepse e mohon faktin se shumicën e qytetarëve i ka kundër”, shprehet ai.
Gazetari Halil Matoshi thotë se Lëvizja Vetëvendosje po i zbutë retorikat e forta dhe nacionaliste si dhe po iu përshtatet rrethanave të reja politike, si forcë parlamentare, dhe si e tillë po jep sinjale se nuk e ka ndërmend që për gjithçka të bie ndesh me ndërkombëtarët, veçanërisht jo me amerikanët.
Pra kjo parti po modernizohet ngadalë, porse e ka shumë të vështirë t’i pranojë gabimet publikisht.
“Ymeri nuk është i lindur si lider, ai jo që do ta ndryshojë partinë, por mund ta dobësojë atë duke humbur votues potencialë, duke qenë më inert dhe më i ngurtë në politikat kombëtare, por besohet të jetë më i pranueshëm se Albin Kurti në politikat ndërkombëtare”, thekson ai./TeSheshi/
