Anëtarë të komunitetit minoritar Jezidi, i cili qe sulmuar brutalisht nga ISIS-i, kanë plaçkitur dhe djegur shtëpitë e myslimanëve në Sinxhar menjëherë pasi u morr nga militantët, thanë disa dëshmitarë.
ISIS-i e mori qytetin verior vitin e kaluar, duke vënë në shënjestër jezidët, besimi i të cilëve konsiderohet heretik, me anë të një fushatë masakrash, skllavërimesh dhe përdhunimesh, të cilat Organizata e Kombeve të Bashkuara i quajti si gjenocid i mundshëm.
Jedizët, të cilët i ikën sulmeve të ISIS-it në gusht të 2014-ës thanë për AFP-në se disa nga komshinjtë e tyre myslimanë e kishin bërë të mundur sulmin, duke i identifikuar ata për llogari të anëtarëve të grupit terrorist.
Sinxhari iu mor ISIS-it ditën e premte gjatë një operacioni të drejtuar nga forcat e rajonit autonom kurd në Irak e të mbështetura nga sulmet ajrore të Shteteve të Bashkuara.
“Shtëpitë e myslimanëve u plaçkitën dhe u dogjën,” sidomos ato ku ishte shkruar “suni” pas marrjes së kontrollit nga ISIS-i, tha një dëshmitar, i cili nuk pranoi të identifikohej.
Një gazetar i AFP-së i ka parë shtëpitë në Sinxhar që ishin shënuar me “suni”. Me shumë gjasa kjo ka qenë një mënyrë për të identifikuar se cilat shtëpi duhej të mbroheshin.
“Pashë njërën nga xhamitë që u dogj nga jezidët,” tha dëshmitari.
Një dëshmitar i dytë, i cili kërkoi gjithashtu që të mos identifikohej, raportoi se edhe ai i kishte parë jezidët që plaçkisinin shtëpitë e myslimanëve dhe më pas u vinin zjarrin.
Drejtues të forcave kurde të sigurisë mohuan të ketë pasur plaçkitje dhe djegie, por që për momentin nuk mund ta verifikonin këtë gjë.
Grupi i të Drejtave të Njeriut i Amnesty International ka dokumentuar sulme nga militantë jezidi kundër dy fshatrave arabë suni në veri të Sinxharit në muajin janar, ku 21 vetë u vranë dhe shumë shtëpi u dogjën.
Plaçkitja dhe djegia e shtëpive ka ndodhur edhe në zona të tjera menjëherë pasi janë rimarrë prej ISIS-it, duke shkaktuar zemërim në mesin e banorëve dhe duke kërcënuar në këtë mënyrë stabilitetin afatgjatë. /tesheshi.com/
