Përgatiti: Drilon SYLEJMANI
Raul Gonzales është futbollisti i fundit nga “Epoka Galacticos”, që ka varur këpucët në gozhdë.
Yjet e dikurshme të Real Madrid-it, tashmë mbeten një histori e mirë për tu rrëfyer dhe gjithmonë do kujtohen për klasin dhe grintën që patën brenda dhe jashtë fushës së blertë.
Gjithçka nisi me ardhjen e Presidentit, Florentino Perez në krye të Real Madrid-it, që në vitin 2000 fillon ndërtimin e një epoke që më vonë do quhej “Galacticos”. Ky term u përdor nga gazetarë e publicistë të njohur, pasi Perez kishte ndërtuar një ekip të klasit botëror me emra të mëdhenj si: Luis Figo, Zinedin Zidane, David Beckham, Roberto Carlos, Ronaldo Nazario Da Lima dhe lojtarë të dalë nga akademia e klubit si Iker Casilas, Michael Salgado, Jose Maria Guti e Raul Gonzales.
Suksesi fillestar
Klasi që kishte krijuar brenda skuadrës, patjetër që do sillte frytet e saj. Real Madrid ngrit në palmaret e saj dy tituj radhazi të kampionatit spanjoll në sezonet 2000/01 dhe 2002/03. Por, suksesi kulmor do të arrihej me ngritjen e trofeut të Ligës së Kampionëve në sezonin 2001/02, me golin e çmuar nga Zidane, që ende shërben si pikë reference për gjeneratat e reja.
Më pas vijnë edhe nënshkrimet e reja, që më shumë sjellin bujë mediatike jashtë tapetit jeshil sesa brenda saj. Ardhja e David Beckham nga Manchester United konsiderohet një makinë për rritjen e buxhetit të klubit mbretëror, që shfrytëzon imazhin e yllit anglez për tu ngritur në piedestalin më të lartë në anën e marketingut. Burimet që Real Madrid i gjeneroi nga klasi i “Galacticos”, bënë që mbretërit ti japin fund lidershpit shumëvjeçar të skuadrës angleze, Manchester United, si klubi më i pasur në botë. Por, ky do ishte suksesi i fundit që do e arrinte presidenti Perez me epokën e famshme të galaktikëve pasi suksesi në anën sportive do mbetej nën hije.
Rrënimi i “galaktikëve”
Epoka “Galacticos” fillon të rrënohet që nga pensionimi i njërit ndër futbollistëve më të mirë në histori, Zinedin Zidane, në vitin 2005. Më pas vijnë largimet e yjeve të tjerë si Luis Figo, Roberto Carlos, David Beckham, Raul e Ronaldo. Shkëlqimi i tyre kishte mbetur nën hijen e lojtarëve të tjerë që kishin ardhur të vazhdonin epokën e tyre, por pa klasin dhe krenarinë që dikur kishin ngritur brenda për brenda Bernabeu-t, galaktikët e Florentino Perez, që gjithashtu i kishte dhënë fund “Misionit të Parë”.
Rikthimi në Presidencën madriliene u prit me shumë bujë mediatke, por Perez me gjithë nënshkrimet astronomike me lojtarë të rinj, nuk arriti më famën dhe prestigjin që kishin dikur galaktikët e tij. Megjithatë, ai do të kujtohet gjithmonë si njeriu dhe arkitekti që ndërtoi një dinasti të quajtur “Los Galacticos” që i dha futbollit klasin dhe spektaklin./tesheshi.com/
