Nga Redaksia
Më 26 dhjetor 2014, në veri të Mitrovicës, e pikërisht në afërsi të shkollës fillore “Aziz Sulejmani”, do ekzekutohej brenda automjetit të tij 34-vjeçari serb, Ivica Rajçiç. Dhe si me shumë krime të tjera të ndodhur në veri, edhe për këtë rast nuk ka asnjë autor.
Por në rrugë të tjera, në ato konfidenciale, janë bërë të ditura si motivet ashtu dhe autorët e kësaj vrasjeje.
Ivica Rajçiç, është ekzekutuar dy javë pas morri guximin dhe dëshmoi në EULEX dhe Policinë e Kosovës lidhur me kontrabandim të armëve, eksplozivit, drogës dhe mallrave me akcizë nga Serbia drejt në Kosovës.
Tre burime, dy nga misionet ndërkombëtare (KFOR-EULEX) dhe një nga brenda Policisë së Kosovës, me kusht të anonimitetit të plotë, i thanë portalit tesheshi.com se Rajçiç atë u vra me qëllim fshehjen e krimeve që kanë kryer dhe janë duke i kryer në veri të Mitrovicës dhe Kosovës grupe kriminale serbe të lidhura ngushtë me eksponentë të Policisë së Kosovës atje.
Portali tesheshi.com, përmes burimeve të veta të sigurta, ka ardhur deri tek informacionet se Ivica Rajçiç është vrarë nga serbët e veriut të Mitrovicës në bashkëpunim me një grup kriminal serb nga qyteti i Krushevcit të Serbisë, të që vazhdojnë të veprojnë ende në veri.
Si i është thënë redaksisë së tesheshi.com, Rajçiç ka folur për kontrabandën e drogës, të armëve, eksplozivit dhe të mallrave me akcizë për zyrtarë të EULEX-it dhe për zyrtarë të Policisë së Kosovës të krimeve të rënda në Prishtinë, dy javë para se të vritet. Dhe ai, në tërë këtë lëmsh kriminal të dëshmuar e denoncuar që e ka bërë fije-fije, ka përfshirë si të inkriminuar edhe krerët e Policisë së Kosovës në veri.
Dëshmia e Rajçiçit e lidhte kreun e Policisë së Kosovës në veri me grupe kriminale që janë përgjegjëse për krimet më të rënda që janë kryer në veriun e Mitrovicës dhe Kosovës, siç janë sulmet me bomba nëpër shtëpi dhe banesa, djegia e makinave, si dhe shkatërrimi i pasurisë të të ashtuquajtur “serbëve të padëgjueshëm”, e deri tek vrasja e Dimitrije Janiçieviçit në oborrin e shtëpisë së tij në veri të Mitrovicës, vrasje kjo e cila deri më sot nuk është zbardhur.
Por më konkretisht, burime nga hetuesit që janë duke punuar në zbardhjen e vrasjes se Rajçiçit, theksojnë se likuidimi i serbit 34-vjeçar është bërë direkt me urdhër të kryekriminelit të veriu të Mitrovicës dhe Kosovës, Millan Radoniçiçit, i cili përmes Policisë së Kosovës dhe EULEX-it, ka ardhur deri tek informacionet se Rajçiç do të jetë dëshmitar kryesor në gjyqin që pritej të mbahej kundër krimit të organizuar në këtë pjesë të Kosovës.
Këtë informacion, sipas burimeve të portalit tesheshi.com, Millan Radojnçiçit ia ka servuar një nga inspektorët e inteligjencës së Policisë se Kosovës për rajonin e Mitrovicës si dhe pjesëtari i EULEX-it, me inicialet R.M, me nofkën Roki.
Pas kësaj, Ivica Rajçiç është ekzekutuar në stilin mafioz në makinën e tij në pasditen e 26 dhjetorit 2014, në afërsi të shkollës fillore “Aziz Sylejmani”-Sveti Sava në veri të Mitrovicës, pikërisht në parkingun e çerdhes së fëmijëve, ndërsa qëndronte i ulur në makinën e tij.
Vrasja e e Rajçiç, në terma zyrtarë nuk është zbardhur ende, ndonëse dihet tashmë.
Duhet përmendur se pas vendosjes së barrikadave nga ana e grupeve kriminale serbe në veriun e Kosovës (nga ish-pjesëtarët e MUP-it e Civilna Zastita-s) e me përkrahjen direkte nga Beogradi, këto grupe, prej së cilave ka rënë viktimë dhe bashkëkombasi i tyre Rajçiç, kanë bërë terror në veriun e Mitrovicës dhe Kosovës.
Në atë kohë, për çdo natë, serbëve të cilët janë dyshuar se janë luajalë ndaj institucioneve të Kosovës, iu është vënë eksploziv në shtëpi apo banesë, iu është shkatërruar makina apo dyqani, si dhe në raste më ekstreme iu është shtënë me armë zjarri në shtëpi apo banesë.
Gjatë këtyre viteve, janë shkatërruar me eksploziv të gjitha antenat e transmetuese të IPKO-së e PTK-së në veri të Kosovës, ndërsa vetëm në veri të Mitrovicë kanë ndodhur mbi 20 shpërthime me eksploziv, duke mos llogaritur këtu edhe të shtënat me armë të zjarrit.
Zyrtarë të Policisë së Kosovës në Mitrovicë dhe EULEX-it, nuk kanë dashur që të prononcohen rreth këtyre akuzave, por janë mjaftuar të thonë shkurt janë duke e hetuar vrasjen e Rajçiçit, të tjera incidente, si dhe lidhjen e krimit të organizuar me një pjesë të Policisë së Kosovës. /tesheshi.com/
