Gjithçka është zgjidhur në momentin e fundit, por incidenti nuk është shmangur. Një amerikan i akomoduar në hotelin Sheraton ka sjellë kundërshtimin e egër të diplomatit serb që merret me sigurinë e ekipit.
Një menaxher i hotelit i tha faqes elektronike tesheshi.com se gjithçka ka qenë një keqkuptim dhe u zgjidh, por minutat kanë qenë mjaft tensionuese.
I ngarkuari me sigurinë e ekipit udhëtues ka kërcënuar se lojtarët do të flenë në autobus, me arsyen e vetme se një person me pasaportë amerikane, i cili është një shkrimtar i njohur, ndodhej në katin e caktuar për serbët. Kur u mësua emri i shkrimtarit, gjithçka u zgjidh. Menaxheri i Sheratonit u shpreh në konfidencë se shkrimtari është aq i famshëm, sa nuk u regjistrua në hotel me emrin e tij për të mos rënë në sy. Shkrimtari do të jetë i pranishëm në “Elbasan Arena”, dhe ka marrë ftesë madje dhe nga kryeministri i Serbisë.
Incidenti ka marrë fund kështu pa pasoja, por ka lënë pa dyshim shije të hidhur. Ka mjaftuar vetëm prania e një personi me pasaportë amerikane që serbët të nisin rrëmujën, e ta bëjnë shefin e sigurisë së tyre të kërcënojë me mosqëndrim në hotel. /tesheshi.com/
