Nga Bardha Nergjoni
Jo shumë larg qendrës së Tiranës, në një rrugë kryesore mund të gjesh një dyqan që gjithçka e ka të lidhur me natyrën. Nëse kërkon lëng molle Korçe, kumbulla të thata Puke, reçelra të shumëllojshëm, shafran, mjaltë nga zona të ndryshme të Shqipërisë si dhe punime të ndryshme balte, tezgjahu e druri, mund t’i gjesh të gjitha pa u lodhur shumë.
Ka lindur si iniciativë e një grupi pukjanësh që produktet e tyre origjinale të traditës të kenë mundësi t’i bëjnë të njohura për shqiptarët dhe të huajt në mes të kryeqytetit.
“Albania by natyre” të fton për të parë, shijuar dhe blerë produkte natyrale por edhe të certifikuara. Gjithçka që vjen nën këtë logo e ka një çertifikatë, ka një origjinë dhe të përcjell shijen e tradicionales të fshehur në kujtesë nga fëmijëria, kur recetat tradicionale të gjyshes vlejnë sa mijëra gatime të sotme. Matilda të pret me shumë dashamirësi dhe përkushtim. Ajo sapo është diplomuar në inxhinieri fizike dhe sigurisht që nuk do ta lërë profesionin e saj të së ardhmes, por, ndërkohë, pasioni i saj janë produktet bio dhe kontaktet me njerëz të ndryshëm. Me shumë delikatesë i shërben gjithkujt, shqiptar apo i huaj që ndalet në këtë pikë natyrale në Tiranën e konsumit dhe jetës frenetike. Koha kalon mes pijeve, reçelrave, punimeve të duarve të mjeshtërve thuajse nga e gjithë Shqipëria. Janë mbi 200 produkte të servirura bukur, të garantuara në cilësi dhe të certifikuara si organike. Synimi është shtimi i llojeve dhe përfshirja e të gjithë territorit shqiptar me produkte që nuk mungojnë por që duhet të kontrollohen që të tregtohen lehtësisht dhe të tërheqin shumë blerës.
Matilda Shkjau e lindur dhe e rritur në Pukë, tregon se projekti nuk ka shumë që ka nisur dhe fillimisht ka qenë Puka qendra e tij për tu përhapur më pas në zona të tjera dhe çeljen e një pike në Tiranë. “Është një dyqan që promovon të gjitha produktet organike në Shqipëri. Fillimisht e kemi nisur me Pukën dhe më pas jemi shtrirë në Shkodër, Korçë, Dibrën, Tiranë duke grumbulluar produkte të të analizuara dhe të çertifikuara nga institucione të specializuara si brenda vendit ashtu edhe jashtë vendit”.
Gjithçka, tregon Matilda për tesheshi.com, ka ardhur nga një financim i huaj dhe që po vazhdon nga një grup shqiptarësh që vendosën të kenë një pikë me këto produkte në kryeqytet.
“Ka dy vjet që po zbatohet si projekt. Erdhi si rezultati i një financimi nga bashkia e Milanos i cili u mendua fillimisht për t’i ardhur në ndihmë të gjithë fermerëve dhe prodhuesve të vegjël në rrethinat e Pukës. Më pas duke u diskutuar ndërmjet anëtarëve të bordit u arrit në përfundimin që mënyra më efikase për t’i promovuar këto prodhues ishte hapja e një pike që edhe ata që i kërkojnë këto produkte të kenë mundësi ku të referohen dhe prodhuesit të kenë mundësi të shesin ato. Fillimisht u mendua për Shkodrën por duke pasur parasysh se lëvizja këtu është më e madhe dhe turistët janë më të shumtë atëherë do të kemi më shumë impakt dhe shitje më të mëdha u vendos të hapej në Tiranë”.
Matilda ka një profesion krejt të ndryshëm nga ajo që bën aktualisht por servirjen, kontaktet me njerëzit pse jo dhe njohjen e shijeve të produkteve i ka pasionin e saj me të madh. “Unë jam inxhiniere fizike. Sapo kam përfunduar studimet por me produktet bio më ka lidhur familja. Kam kam nënën që ka një jetë që merret me prodhimin e lëngjeve, likove, reçelrave, etj. Qysh pas 8-vjeçares jam marrë me këtë punë dhe gjithmonë më tërheq. Kontaktet me njerëzit më kanë pëlqyer shumë. Më pëlqen të bëj një punë konkrete, të përkrah të gjithë individët që kanë nevojë dhe punojnë me seriozitet”.
Matilda pranon se produkteve shqiptare i mungon së pari certifikimi dhe së dyti promovimi. “Blerësit janë si të huaj ashtu edhe shqiptarë dhe vë re që i kërkojnë këto produkte pasi janë shkëputur dhe ka nga ata që thonë se kemi humbur shijen. Qëllimi ynë është ata të rigjejnë shijen nëpërmjet këtyre produkteve. Kemi mjaft produkte dhe larmishmëri por thjesht mungon nxitja por edhe fakti se duhet ecur në bazë të rrugullave të sigurisë së produkteve dhe etiketimi, paketimi, etj., pasi të gjitha këto kanë rolin e tyre”.
Ndërkohë që produktet shtohen, cilësia ka rolin e saj dhe fakti që duhet të ruhet ajo çfarë i dallon, të qenit organike. Ky bashkim shqiptarësh ka si synim të ruajë shijen e produkteve vendase dhe të mbështesë të gjithë ata që kërkojnë të jenë korrektë me cilësinë duke mbajtur lart gjithçka shqiptare që kërkohet mjaft si nga të huajt ashtu edhe nga ata që duan të arratisen nga jeta moderne për të gjetur pakëz traditë në gjëra të mrekullueshme për rigjetur shijen dhe bashkë me të kujtimet e të shkuarës. /tesheshi.com/
