Ministri i Jashtëm i Italisë, Angelino Alfano, ka njoftuar se kanë vendosur të ndalojnë akreditimin e ambasadorit të Koresë së Veriut në Romë dhe se ai duhet të largohet nga Italia.
Në një deklaratë për gazetën “La Repubblica”, Alfano është shprehur se “kemi marrë një vendim të ashpër duke ndalur procedurën e akreditimit të ambasadorit të Republikës Popullore Demokratike të Koresë. Ambasadori është i detyruar të largohet nga Italia”.
Pasi ka vënë në dukje se Koreja e Veriut në javët e fundit ka kryer testime më të mëdha në krahasim me testimet nukleare të mëparshme dhe vazhdon lëshimin e raketave balistike, Alfano tha se Italia e cila kryeson Komitetin e Sanksioneve të Këshillit të Sigurimit të Kombeve të Bashkuara i bën thirrje komunitetit ndërkombëtar që të vazhdojë me rritjen e presionin mbi qeverinë e Phenianit.
Më parë edhe Kuvajti, Peruja, Meksika dhe Spanja kanë shpallur të padëshirueshëm ambasadorët e Koresë së Veriut. /tesheshi.com/
