Partitë opozitare LVV, AAK dhe NISMA kanë paralajmëruar se sërish e sërish do të organizojnë protesta, pasi që Qeveria e Kosovës, nuk ka bërë asnjë lëvizje pas adresimit të disa kërkesave nga protesta e fundit.
Partitë politike opozitare, Lëvizja Vetëvendosje, Aleanca për Ardhmërinë e Kosovës dhe Nisma për Kosovën më 18 prill, kanë mbajtur një protestë me kërkesa kundër shtrenjtimit të energjisë elektrike, kundër kontrollit shtetëror mbi transmetuesin publik, Radio-Televizionin e Kosovës, kundër uzurpimit të sistemit gjyqësor dhe kundër formimit të Asociacionit të komunave me shumicë serbe.
Ndërsa të shtunën kryeministri i Kosovës, Isa Mustafa, ka deklaruar se Qeveria e Kosovës, ka një program qeverisës që do të zbatohet dhe nuk do të merret me atë çka thotë opozita.
“Asnjë afat nuk na bën përshtypje, sepse programi nuk mund të afatizohet në dy javë apo tre javë. Asnjë veprim nuk do ta bëjmë në bazë të ultimatumeve. Do të punojmë në mënyrë stabile, ashtu siç jemi duke punuar dhe në mënyrë stabile do ta çojmë mandatin deri në fund”, ka deklaruar Mustafa, deri sa i ka bërë një vizitës Panairit të Përgjithshëm Ndërkombëtar “Prishtina 2015”.
Kurse kryetari i Lëvizjes Vetëvendosje, Visar Ymeri, ka thënë se Qeveria e Kosovës, jo vetëm që nuk i ka adresuar kërkesat, por ka vazhduar me avazin e vjetër duke e forcuar, siç është shprehur ai, “kapjen e shtetit”.
Ymeri, duke folur para gazetarëve, ka theksuar se protesta mbetet e vetmja zgjidhje për përmbushjen e kërkesave të tyre.
“Në këtë drejtim, është e domosdoshme që të intensifikohen aksionet dhe veprimet politike, në mënyrë që ky shtet i Kosovës të çlirohet nga kapja dhe institucionet e Kosovës t’i kthehen interesit të qytetarëve. Natyrisht që qeveria e kapjes nuk mund të jetë edhe qeveri e republikës, ndërkohë që qytetarët e organizuar janë fondamenti i republikës”, është shprehur Ymeri.
Ndërsa përfaqësuesi nga partia Aleanca për Ardhmërinë e Kosovës, kanë thënë se afati dyjavor për Qeverinë e Kosovës, ishte që të nisë implementimin e kërkesave të dala nga protesta e fundit, që ka skaduar dhe se sipas tyre, deri tash nuk ka pasur asnjë ndryshim.
Nënkryetari i kësaj partie, Ahmet Isufi, ka thënë para gazetarëve se Qeveria, deri tash nuk ka nisur realizimin e kërkesave dhe kjo, sipas tij, tregon për mospërfilljen e kërkesave të të gjithë qytetarëve.
Në ditët në vijmë mbetet të mësohet së a do të protestojnë përsëri partitë opozitare për “kapjen e shtetit” ashtu siç kishin deklaruar.
Tri partitë opozitare, Lëvizja Vetëvendosje, Aleanca për Ardhmërinë e Kosovës dhe Nisma për Kosovën, kishin bojkotuar vazhdimin e seancës plenare të 16 prillit për shkak të mos futjes si pikë e rendit të ditës diskutimin për peticionin me mbi 30 mijë nënshkrime kundër shtrenjtimit të energjisë elektrike.
/tesheshi.com/
