I dërguari special i SHBA-së për Ballkanin Perëndimor, Gabriel Escobar, kërkon që Prishtina të dalë shpejt me një propozim për formimin e Bashkësisë së Komunave Serbe. Beogradi, nga ana tjetër, duhet të sinjalizojë se dhuna nuk do të pranohet.
Escobar tha se “ne duhet të thyejmë ciklin e dhunës”.
“Qeveria e Kosovës nuk duhet t’i detyrojë kryetarët shqiptarë në veri të kalojnë nëpër zyra komunale, të cilat janë kaq simbolike për serbët. Megjithatë, puna administrative duhet të vazhdojë. Udhëheqja e Serbisë, nga ana tjetër, duhet të dërgojë një mesazh të qartë: dhuna nuk do të tolerohet kundër paqeruajtësve të KFOR-it apo policisë. Dhe atëherë duhet të kërkojmë një mënyrë për të krijuar besim më të madh, edhe nëse kjo do të thotë zgjedhje të reja për kryekomunarë”, tha Escobar.
Deklaratës se Serbia po kërkon themelimin e Bashkësisë së Komunave Serbe në Kosovë dhe se Kosova e refuzon atë nga shqetësimi se mund të çojë në një Republika Srpska të re, e cila më pas do të bllokonte shtetin si në Bosnje, i dërguari amerikan ishte kategorik se ajo “nuk do të jetë një Republika Srpska e re si në Bosnje dhe Hercegovinë”.
“Themelimi i Bashkësisë së Komunave Serbe në Kosovë është obligim ndërkombëtar, ligjërisht i detyrueshëm. Ajo i referohen Marrëveshjes së Brukselit, konkluzioneve të Këshillit Evropian dhe Marrëveshjes së Ohrit. Dhe ekziston përkushtimi i SHBA-së për të. Prandaj duhet të vijë Bashkësia e Komunave Serbe. Pyetja është: si do të duket? Nëse Kosova nuk dëshiron një Republikë Srpska të re si Bosnja, ajo duhet të na japë një ide se çfarë dëshiron. Na thanë se atë nuk donin. Tani ata duhet të na thonë se çfarë duan. Ne jemi duke pritur për të. Kosova duhet të na japë menjëherë një projekt-marrëveshje”, shpjegoi Escobar për Die Presse.
Ai po ashtu tha se ZSO nuk varet nga kryeministri i Kosovës, Albin Kurti, i cili nuk e dëshiron.
“Nuk varet nga ai. Kjo nuk është çështje e Kurtit dhe Serbisë. Kjo është një çështje ndërmjet Republikës së Kosovës dhe Republikës së Serbisë. Edhe nëse nuk do Kurti, do të formohet ZSO”, tha diplomati amerikan. /tesheshi.com/
