Ngërçi për integrimin e vendit është kthyer në një fushë-betejë akuzash mes mazhorancës dhe opozitës. Duke shfrytëzuar aktivitetet që pasqyrohen në media, kryeministri Edi Rama fajëson Partinë Demokratike se ka bllokuar ligjin e Vettingut, ndërsa nga ana tjetër lideri i kësaj force politike, Lulzim Basha e akuzon atë si përgjegjës për ngërçin e negociatave, pasi sipas tij bota dhe Europa po u bie këmbanave se krimi dhe droga kanë shtënë shtetin në dorë.
“Droga po mbyt Shqipërinë, në bashkëpunim me policinë. Krimi ka shtënë në dorë shtetin dhe ekonominë. Klientët e tij po plaçkisin pasuritë e vendit, me tendera e konçesione. Shqipëria po zbarzët e njërëzit po ikin, ndërsa ky thotë fajin e ka opozita. Bota po i bie këmbanave të alarmit për gjendjen e vendit dhe ai përgjigjet se opozita është fjatore”, tha Basha gjatë një takimi me kryetarët e bashkive të Partisë Demokratike.
Nga ana tjetër, kryeministri Rama ju përgjigj menjëherë deklaratave të kreut të PD-së në facebook duke i thënë: “Lulzim mos kap skutave deputetë të huaj për të sharë e për të bllokuar Shqipërinë po lexo rekomandimin e qartë të BE dhe zhblloko Vetingun!”, u shpreh ai.
Po ashtu, Lulzim Basha foli edhe për programin social të Partisë Demokratike, ku sipas tij në fokus të platformës do të jenë njerëzit në nevojë.
“Brenda 15 janarit degët tona, anëtarët tanë, këshilltarët bashkiakë, të evidentojnë në çdo rreth gjendjen reale të papunësisë, jo thjeshtë si statistikë, numrin e njerëzve në vështirësi ekonomike, ata që kanë pasur dëme nga përmbytje, fshatarët që kanë humbr bagëtitë nga dermatoza nodulare etj.”, tha Basha.
Basha i ka bërë thirrje qeverisë që të kryejë akordojë një fond për vaksinimin e plotë të bagëtive të prekura nga dermatoza nodulare dhe sipas tij janë rreth 400 mijë krerë në gjithë vendin. /tesheshi.com
