Seanca e fundit plenare në Kuvend u shoqërua me debate të ashpra dhe incidente mes mazhorancës dhe opozitës. Madje, u ndërpre dy herë brenda pak minutash për shkak të incidenteve.
Pas shqyrtimit të këtyre situatave, Byroja e Kuvendit ka vendosur gjatë mbledhjes së ditës së hënë të përjashtojë për 5 ditë nga punimet kryetari i grupit parlamentar demokrat, Edi Paloka.
Ai shtyu fizikisht ministrin e Shëndetësisë, Ilir Beqaj gjatë kohës që ky i fundit do të merrte fjalën, në foltoren e parlamentit.
Vendimi për ndëshkimin e Palokës u mor me votat pro të Partisë Socialiste. Ndërkohë, PD-ja ka kundërshtuar, kurse anëtarët e LSI-së kanë abstenuar.
I menjëhershëm ishte edhe reagimi i Partisë Demokratike, pas këtij vedimi, përmes nënkryetarit, Edmond Spaho. “Asgjë s’ka për të ndryshuar nga qëndrimi që mbajtëm në seancë, pavarësisht përpjekjeve që bën mazhoranca, për të na kufizuar fjalën”, tha Spaho.
Ndërkohë, deputeti Flamur Noka u përjashtua po atë ditë (të enjten), pasi nuk lejonte kryeministrin Rama të fliste në foltoren e Kuvendit, pasi sipas tij ishte radha e Berishës dhe jo e tij./tesheshi.com
