LeBron James nxirret jashtë fushe për herë të parë në karrierën e tij 15-vjeçare si basketbollist profesionist në NBA. “Mbreti James” është përjashtuar nga arbitri, pasi ka marrë fillimisht një faull teknik.
Në ndeshjen që skuadra e tij Cleveland Cavaliers fitoi 108-97 ndaj Miami Heats, ish-shkuadrës së tij, James i ka shfryrë dufin arbitrit Kane Fitzgerald, pasi është mbrojtur rëndë nga kundërshtari gjatë gjithë ndeshjes.
“Unë pësova faull dhe ia zbraza gjithë frustrimin tim arbitrit, i cili më dërgoi më pas në dhomat e zhveshjes. Gjatë gjithë ndeshjes jam markuar ashpër dhe kundërshtari më ka bërë faulle në cdo cep të parketit, por askush nuk u nxorr jashtë prej tyre”- është shprehur LeBron James për kanalin e famshëm ESPN.
“Unë i thashë pikërisht këtë, mbase me njëfarë toni dhe ai më nxorri menjëherë jashtë. Ndodhi çfarë ndodhi, rëndësi ka që ne fituam dhe kjo është mbi të gjitha. Asnjëherë nuk jamë përjashtuar në jetën time. Por ndoshta nuk thonë kot që ka një herë të parë për të gjithë, e sot ishte nata ime”- e ka mbyllur me të qeshur James, i cili numëron 1082 ndeshje në NBA në 15 vite të aktivizimit të tij në kampionatin më të fortë të basketbollit në botë. /tesheshi.com/
