3-0! Kundër Atletikos! Kundër një prej mbrojtjeve më të forta! Kundër Diego Simeone-s!
E bën Reali, rivali i kryeqytetit spanjoll! Për të, një tjetër finale e Champions League-s në horizont!
Reali i rekordeve: është shënuar në 36 ndeshje të njëpasnjëshme të Champions League-s në “Santiago Bernabeu”! Në prill të 2011-s… Kaq larg duhet të shkosh për të gjetur një ndeshje në “Bernabeu” në këtë veprimtari ku Reali nuk shënon!
Njeriu i ndeshjes? Eurosport jep këtë përgjigje: “E kush tjetër? Ronaldo vazhdon të kapë lartësitë. Lojtarët e mëdhenj japin kur ka më tepër rëndësi, dhe ai ishte rishtas diferenca e madhe e mbrëmjes.”
Zidane pas fitores: “U përgatitëm dhe e ekzekutuam ndeshjen tonë mjaft mirë. Rezultati 3-0 pasqyron superioritetin tonë dhe nivelin e paraqitjes sonë. Por e dimë se kemi ndeshjen e kthimit, e do duhet të luftojmë fort, sepse, pa dyshim, do të vuajmë atje.”
Simeone, një luftëtar i paepur, si dikur kur luante në fushë, nuk dorëzohet: “Nuk mendoj se është e pamundur [një përmbysje]. Kemi ndeshjen e kthimit, dhe u them lojtarëve të mi e tifozëve se po, ne mundemi! Ne e quajmë veten Atletiko e Madridit, dhe ne jemi në gjendje ta bëjmë atë [përmbysjen].”
2 maj 2017: gjysmëfinalja e parë e Champions League-s, Real – Atletiko përfundon 3-0!
10 maj 2017: ndeshja e kthimit e kësaj gjysmëfinaleje. Pas aktit të parë të dramës, është radha e aktit të dytë. Përgatituni për gjithçka: asgjë nuk ka mbaruar! /tesheshi.com/
