ILDKP kallëzoi penalisht kreun e Gjykatës së Apelit të Tiranës, Alaudin Malaj duke e akuzuar atë për fshehje të pasurive, deklarim të rremë të interesave private, mungesë burimesh të ligjshme financiare dhe dyshime për pastrim parash në shumën 1.7 milion euro.
Institucioni I kontrollit të pasurive të zyrtarëve ka kërkuar nga prokuroria hetim të plotë për kryegjyqtarin e Apelit të Tiranës, pasi sipas këtij institucioni, “ka dyshime të forta për injektime parash të pista nga Alaudin Malaj, nëpërmjet skemës së krijimit të bizneseve të ndërtimit në emër të familjarëve të tij, kalimin e aseteve, vlerave monetare dhe aksioneve te subjekti nëpërmjet kontratave fiktive të huave e të dhurimit, e më pas shitjen dhe riinvestimin e tyre nga subjekti në aktivitete brenda dhe jashtë vendit”.
“Subjekti Alaudin Malaj në vitin 2003, në deklarimin e parë të interesave private, ka deklaruar gjithsej asete në shumën 60.000 euro dhe në fund të vitit 2014 pasuria e subjektit ka arritur gjithsej në shumën rreth 1,7 milion euro”, njofton ILDKP.
ILDKP thotë se do të njoftojë menjëherë Këshillin e Lartë të Drejtësisë dhe ministrin e Drejtësisë me qëllim marrjen e masave disiplinore ndaj gjyqtarit. /tesheshi.com/
