Presidentja Atifete Jahjaga e kryeministri Isa Mustafa dhe liderë të tjerë të politikës e jetës publike, kanë shprehur ngushëllime e kanë vlerësuar figurën e akademikut Mark Krasniqi, I cili ndërroi jetë në moshën 95-vjeçare.
“Akademik Mark Krasniqi, me veprimtarinë e tij të jashtëzakonshme, ka dhënë kontribut të jashtëzakonshëm për Kosovën, duke lënë gjurmë të pashlyeshme në arsimin, në shkencën, kulturën dhe botën akademike të Kosovës”, thuhet në telegramin e kryeministrit Mustafa.
Presidentja e Kosovës, Atifete Jahjaga, ka ngushëlluar familjen e akademikut të cilin e cilëson një prej personaliteteve më të njohura të shkencës dhe të politikës në vendin tone e që gjithë jetën ia kushtoi çështjes kombëtare.
“E ndaj me ju, e nderuara familja Krasniqi, këtë dhimbje të madhe për humbjen e njeriut më të dashur, duke e kujtuar përherë punën dhe angazhimin e palodhshëm për dekada me radhë të akademik Mark Krasniqit”, thuhet në telegramin ngushëllues të presidentes Jahjaga.
Mark Krasniqi ka qenë profesor, shkrimtar dhe akademik. Ai ka shërbyer si kryetar i Akademisë së Shkencave dhe Arteve të Kosovës. Po ashtu ka qenë anëtar i Kuvendit në disa legjislatura, duke përfaqësuar partinë Demokristiane të Kosovës. /tesheshi.com/
