Kryeministri Ramush Haradinaj premton se çështja e hapur e Demarkacionit me Malin e Zi do të marrë së shpejti një drejtim dhe kjo, sipas tij, do të mundësojë lëvizjen e lirë të qytetarëve të Kosovës në Bashkimin Evropian.
Megjithatë kreu i qeverisë nuk ka dhënë një datë se kur mund t’i ipet një epilog kësaj marrëveshjeje, e cila ka mbetur në sirtarët e qeverisë prej dy vitesh.
Ai tha se Kosova është e angazhuar për ruajtjen dhe ndërtimin e fqinjësisë së mirë dhe në këtë rrafsh i vlerësoi lart marrëdhëniet me Malin e Zi.
Këto komente Haradinaj i ka bërë në një takim që zhvilloi sot me ambasadoren e Kroacisë, Marija Kapitanoviç, me të cilën bisedoi për zhvillimet aktuale në Kosovë dhe rrugën e integrimeve euro-atlantike për vendin.
Haradinaj ka thënë se kufiri është në Çakorrë dhe Kullë, duke thënë se janë bërë disa gabime dhe se duhet të bëhet rishikimi i vijës kufitare me shtetin malazez. /tesheshi.com/
