Komisioneri i Bashkimit Europian për Zgjerimin Johanes Hahn ka deklaruar sot se Shqipëria duhet që përpara vjeshtës së zbatojë 5 prioritetet nëse do të happen negociatat me BE. Ndërkohë Kryeministri shqiptar Edi Rama, deklaroi se në vjeshtë gjitckcka do të jetë gati. Prej ditësh po përflitet për nisjen e një operacioni të gjerë antikorrupsion, i cili po merr një mbështetje të fortë ndërkombëtare madje është si kusht themeltar.
Kryeministri Rama, tha pas takimit me Hahn se ky takim ishte rikonfirmim i angazhimit të dyanshëm për këtë proces. Nga ana jonë, ne konfirmuam vullnetin për reforma dhe implementimin e 5 prioriteteve. Shefi i qeverisë ka nënvizuar se, plotësimi i këtyre kushteve ka avancuar ndjeshëm, duke lënë sipas tij shenjë në nivel institucional dhe sidomos në luftën kundër krimit dhe korrupsionit. Ai është shprehur optimist se Tirana zyrtare do t’i përmbushë detyrimet e saj në kohë dhe do të marrë vlerësimin e duhur nga Brukseli. “Në vjeshtë do t’i japim komisionit në dorë gjithçka të plotësuar sa i takon 5 prioriteteve. Për këtë i kërkova komisionerit që procesi të jetë i qëndrueshëm dhe i parashikueshëm, që brenda kornizës së parashikuar bashkarisht Shqipëria të përgjigjet për detyrat e saj”, ka thënë Rama. Reforma në drejtësi ka qenë një tjetër çështje e prekur prej Ramës, e cila sipas tij, “do të largojë atë sistem të kalbur që është aktualisht dhe do të hedhë themelet për një sistem evropian”.
Më tej kryeministri ka kërkuar nga komisioneri që Bashkimi Evropian të marrë për Shqipërinë shembullin e Malit të Zi sa i takon hapjes së negociatave të anëtarësimit, ndërsa në lidhje me marrëdhëniet mazhorancë-opozitë ka shtuar: “Sot patëm edhe një dialog pozitiv me opozitën, pas boshllëqeve institucionale e politike të saj. Do të jemi përkrah opozitës dhe do krijojmë kushtet që ta dëgjojmë sa më shumë. Është koha më delikate në rajon për të mos e shtyrë procesin e zgjerimit të BE më tutje”, ka thënë Rama. Ai ka bërë me dije se, komisionerit i ka kërkuar gjithashtu që vendet skeptike mbi zgjerimin e BE të mos bëhen pengesë për procesin e Shqipërisë. Komisioneri për Zgjerimin, Hahn në konferencë u shpreh se, Shqipëria duhet të vazhdojë reformën në drejtësi dhe se procesi duhet të jetë tepër efikas. Komisioneri theksoi se Shqipëria ka nevojë për politika serioze në luftën kundër korrupsionit. “Ne kemi shumë dëshirë që Shqipëria të bëhet vend anëtar i Bashkimit Europian dhe kemi patur takime në mbështetje të dialogut”, tha Hahn.
Pyetjet
Sa e gatshme është mazhoranca të bëjë ndërhyrje në Kushtetutë për dekriminalizimin sipas platformës së kërkuar nga opozita?
Rama: Faleminderit por sot e pashë opozitën ndërsa platformën nuk e kam parë.
Zoti Hahn ju u njohët me ecurinë e 5 prioriteteve. Ku patë ecuri pozitive dhe ku jo? E njëjta pyetje edhe për kryeministrin Rama.
Hahn: Duke parë 5 prioritetet kyçe do të thosha sa ka pasur ecuri dhe progres gjithandej dhe fokusi duhet të jetë në të gjitha çështjet që kanë të bëjnë me sundimin e ligjit. Ka nevojë për një gjyqësor të pavarur. Ky është parakusht që të luftohet krimi i organizuar dhe korrupsioni. Normalisht që ka pasur progres, por flitet edhe për trajnimin e gjyqtarëve dhe kemi folur edhe reformë në administratën publike. Nuk duhet të harrojmë si një person që vjen nga Austria se kemi pasur fatin të mos ishim në sistemin komunist, por kemi parë efektet. Më duhet të them se të gjitha ata vende që kanë qenë nën regjimin komunist.
Rama: Për t’i dhënë një përgjigje do t’i referohesha fjalës së komisionarit, është shumë e rëndësishme cilësia por edhe shpejtësia. Në vjeshtë ne do t’i japim komisionit në dorë gjithçka të plotësuar lidhur me të pestë prioritetet nëse i referohemi detyrave të shkruara. Qëllimi nuk është që të çojmë në Bruksel letra por të ndërtojmë Shqipërinë evropiane këtu. Që të bëjmë këtë na vjen në ndihmë procesi i integrimit dhe më të gjithë instrumentat që ky proces iu jep vendeve. Normalisht pastaj pjesa tjetër i takon vendeve anëtare, dhe i mbetet atyre të vendosin
.
